योगेन्द्र योगी
२० भदौ, दोहा ।
साउदी अरबबाट काठमाडौंको लागि थप १५ वटा चार्टर्ड उडान हुने भएको छ। साउदीस्थित नेपाली दूतावासले एक सूचना जारी गर्दै उडान तालिका सार्वजनिक गरेको हो।
दूतावासका अनुसार सेप्टेम्बर ६ देखि ३० तारिखसम्म रियाद तथा दमामबाट उडान हुने छन् । नेपाल जानका लागि आफूलाई पायक पर्ने मिति र एयरलाइन्सबाट टिकट लिन सकिने दूतावासले जनाएको छ ।
साउदी अरवबाट पीसीआर परीक्षण गरेर नेपाल जाने यात्रुले ७२ घण्टाभित्रको पीसीआर नेगेटिभ रिपोर्ट समेत साथमा लिनुपर्ने र नेपाल पुगेपछि १४ दिनसम्म होम क्वारेन्टाइनमा बस्नुपर्ने दूतावासले जनाइएको छ ।
यात्रुले उडान समयको ७२ घण्टाभित्रको पीसीआर नेगेटिभ भएको प्रमाण र कोभिड–१९ संकट व्यवस्थापन सञ्चालन केन्द्रको वेभसाइटमा राखिएको अनलाइन इन्ट्री फारम भरेपश्चात उपलब्ध हुने बारकोड वा प्रिन्ट कपी अनिवार्य रुपमा लिएर जानुपर्ने सूचनामा उल्लेख छ।
पीसीआर परीक्षण नगरी चार्टर्ड उडानमार्फत स्वदेश फर्किने यात्रुहरुले नेपाल पुगेपछि ७ दिनसम्म आफ्नै खर्चमा होटल क्वारेन्टाइनमा बस्नुपर्ने दूतावासले जनाएको छ । नेपाल एयरलाइन्सले सेप्टेम्बर ७ र १९ तारिखमा दमामबाट उडान भर्ने भएको छ ।
हिमालय एयरलाइन्सले सेप्टेम्बर ६,९,१३,१६,१७,२२,२६ तथा २९ मा रियादबाट उडान गर्ने जनाएको छ । यसैगरी, नेपाल एयरलाइन्सले सेप्टेम्बर ८,१८,२०,२४ र २८ मा दमामबाट काठमाडौंको लागि उडान गर्ने दूतावासले जनाएको छ ।
