४ भदौ , काठमाण्डौ ।
२० वर्षमुनिको साफ च्याम्पियनशिप फुटबलमा आज समूह ’बी’ का माल्दिभ्स र भुटान खेल्दैछन् । खेल ललितपुरको सातदोबाटोमा रहेको एन्फा कम्प्लेक्सको मैदानमा दिउँसो तीन बजे शुरू हुनेछ । हिजो भएको खेलमा बङ्गलादेशले श्रीलङ्कालाई हराएसँगै नेपाल एक खेलअघि नै सेमिफाइनलमा पुगेको छ । बङ्गलादेश पनि श्रीलङ्कालाई २–० गोलले हराएर सेमिफाइनलमा पुगेको छ ।
श्रीलङ्का भने लगातार दुई खेल हार्दै समूह चरणबाटै बाहिरिएको छ । नेपालले पहिलो खेलमा श्रीलङ्कालाई १–० गोलले हराएको थियो । भोलि नेपाल र बङ्गलादेशले खेल्नेछन् । यो खेलको विजेता टोलीले समूह विजेताका रुपमा सेमिफाइनल खेल्नेछ । प्रतियोगिताको समूह ’ए’ मा आयोजक नेपालसहित बङ्गलादेश र श्रीलङ्का तथा समूह ’बी’ मा भारत, माल्दिभ्स र भुटान छन् ।
यसैबीच नेपाली राष्ट्रिय फुटबल टिमका पूर्व मुख्य प्रशिक्षक अब्दुल्लाह अल्मुताइरी श्रीलंकाको अन्तरिम प्रशिक्षकमा नियुक्त भएका छन् । श्रीलंका फुटबल संघले मंगलबार अल्मुताइरीलाई एएफसी छनोटका लागि अन्तरिम प्रशिक्षकमा नियुक्त गरेको जनाएको हो । संघका अनुसार अल्मुताइरीले तत्कालैदेखि लागु हुने गरी जिम्मेवारी पाएका हुन् ।
उनले सेप्टेम्बर ५ र १० मा हुने कम्बोडियाविरुद्धको खेलमा श्रीलंकाको जिम्मेवारी सम्हाल्नेछन् । अल्मुताइरी यसअघि सन् २०२१ देखि २०२२ सम्म नेपाली राष्ट्रिय फुटबल टिमको प्रशिक्षकमा नियुक्त भएका थिए । नेपाली टिमले अल्मुताइरीकै प्रशिक्षणमा साफ च्याम्पिनयसिपको इतिहासमा पहिलो पटक फाइनलसम्मको यात्रा तय गरेको थियो ।
तर, राष्ट्रिय टोलीका १० नियमित सदस्यलाई बन्द प्रशिक्षणका दौरान टिमबाट निष्कासन गरेपछि चर्किएको विवादका कारण उनले राजीनामा दिनुपर्ने परिस्थिती सिर्जना भएको थियो । नेपाली टिमपछि अल्मुताइरी अफगानिस्तानको मुख्य प्रशिक्षक बनेका थिए । तर, त्यहाँ पनि खेलाडीसँगको विवादका कारण उनी बर्खास्तीमा परेका थिए । त्यसपछि कुवेती क्लब पुगेका उनको त्यहाँ पनि बसाई लामो रहेन ।
