१२ भदौ , काठमाण्डौ।
२० वर्षमुनिको साफ च्याम्पियनशिप फुटबलको उपाधिका लागि नेपालले आज बङ्गलादेशसँग खेल्दैछ । यो खेल दिउँसो साढे दुई बजे एन्फा कम्प्लेक्सको मैदान सातदोबाटोमा शुरु हुनेछ । अन्य खेल खेलाउन नसकिएपनि फाइनल दशरथ रङ्गशालामा खेलाउने तयारी थियो तर मैदान हिलाम्मे भएकाले सातदोबाटोको कृतिम घाँसे मैदानमै खेल हुन लागेको हो ।
पहिलो सेमिफाइनलमा नेपाल पेनाल्टी सुटआउटमा भुटानलाई ४–१ ले हराएर तथा दोस्रो सेमिफाइनलमा बङ्गलादेश पेनाल्टीमा भारतलाई ४–३ ले हराउँदै फाइनलमा पुगेका हुन् । गएको संस्करणमा भारतले बङ्गलादेशलाई हराउँदै उपाधि जितेको थियो । तसर्थ आज बंगलादेश खाली हात घर नफर्किने गरी मैदानमा उत्रिने छ ।
नेपाल पनि घरेलु मैदानमा उपाधि रक्षा गर्ने लक्ष्यमा रहेको छ । सिनियरतर्फ नेपालको पुरुष र महिला दुवै टोलीले अहिलेसम्म साफ च्याम्पियनसिप जित्न सकेका छैनन् । यस्तोमा नेपाललाई साफ क्षेत्रमा जुनियर टिमले नै सफलता दिलाउँदै आएका छन् । च्याम्पियनसिपको छैटौं संस्करणमा आइपुग्दा नेपालले अहिलेसम्म दुई पटक उपाधि जितेको छ ।
सन् २०१५ मा नेपालबाट सुरु भएको साफ यू–१९ मा नेपालले पहिलो संस्करणको फाइनलमा भारतलाई पेनाल्टी सुटआउटमा हराएर उपाधि जितेको थियो । यस्तै २०१७ मा भुटानमा भएको साफ यू–१८ मा पनि नेपाल च्याम्पियन बनेको थियो । राउण्ड रोविन लिगका आधारमा भएको उक्त च्याम्पियनसिपमा नेपाल शीर्ष स्थानमा रहेर सिधै च्याम्पियन बनेको थियो ।
अब ७ वर्षपछि नेपाल सामु फेरि च्याम्पियन बन्ने अवसर छ । नेपाल ९ वर्षपछि पहिलो पटक फाइनल खेल्दैछ । पहिलो संस्करणपछि नेपाल पहिलो पटक फाइनल पुगेको हो । यता बंगलादेशले भने अहिलेसम्म उपाधि जित्न सकेको छैन । तर बंगलादेश तेस्रो पटक फाइनल खेल्न लागेको हो । यसअघि सन् २०१९ र २०२२ मा बंगलादेश फाइनल पुगेको थियो ।
तर दुवै पटक भारतसँग फाइनलमा पराजित हुँदै उपविजेतामा सीमित भएको थियो । उमेर समूहको यस प्रतियोगितामा नेपाल अहिलेसम्म बंगलादेशसँग पराजित भएको छैन । त्यही इतिहासलाई कायम राख्ने नेपालको लक्ष्य छ । नेपाल यस पटक च्याम्पियन बन्यो भने सर्वाधिक ३ पटक च्याम्पियन बनेको भारतसँग बराबरी गर्ने छ ।
नेपालका कप्तान कुशल देउवाले टिम उपाधि जित्न तयार रहेको बताएका छन् । तयारी राम्रो रहेको पनि उनले प्री म्याच कन्फरेन्समा जानकारी गराए । फरवार्ड लाइनमा तालमेल मिल्न सकेको छैन् भन्ने प्रश्नमा अन्य टिमले नेपाली टिमको विषयमा पनि अध्ययन गरेकोले केहि अप्ठयारो भएको पनि बताए ।
तर उनले आफ्नो टिम र प्रत्येक खेलाडीमा पूर्ण विश्वास रहेको पनि स्पष्ट पारे । उता बंगलादेश समूह उपविजेता बन्दै सेमिफाइनलमा पुगेपनि सेमिफाइनलमा तीन पटकको विजेता तथा डिफेन्डिङ च्याम्पियन भारतलाई टाइब्रेकरमा हराएर फाइनलको यात्रा तय गरेको हो । समूह चरणमा नेपालले बंगलादेशलाई पराजित गरिसकेको छ ।
तर भारतलाई हराएर फाइनल पुगेको टिममा थप आत्मविश्वासी बनेको छ । यद्यपी प्रशिक्षक मारूफुलहलले भारतलाई हराएको पुरानो कुरा भएको र नेपालसँगको फाइनल खेल नयाँ खेल हुने र यो चुनौतीपुर्ण रहने बताएका छन् । उनले नेपालको बारेमा जानकारी रहेको र सोही अनुरुप खेल्ने बताएका छन् ।
बङ्गलादेशका कप्तान मोहमद असिफले नेपाली टिम उत्कृष्ट रहेको तथा नेपालको गतिसँग जानकार रहेको बताए । साथै उनले नेपाली टिममा क्वालिटीका खेलाडी रहेको र त्यसको अध्ययन टिमले गरेको बताए । तर बंगलादेशका पहिलो रोजाइका गोलकिपर मेहदी हसन घाइते भएका छन् । उनको तत्काल शल्यक्रिया गर्नुपर्ने भएकोले फाइनल खेल गुमाउनेछन् ।
यसले टिमलाई केहि असर गर्न सक्छ । तर वैकल्पिक गोलकिपर मोहम्मद आशीफले भारत विरूद्ध टाइब्रेकरमा सानदार प्रदर्शन गरेका थिए । उनले भारतको दुई पेनाल्टी प्रहार रोकेका थिए । अब फाइनलमा गोल पोष्ट सम्हाल्ने जिम्मेवारी उनलाई नै रहेको छ । यस्तोमा नेपाल र बंगलादेशको उपाधि भिडन्त प्रतिस्पर्धी हुने देखिएको छ ।
