विराटनगर,जेठ ९ ः मोरङ मुस्लिम समाजले मुस्लिम समुदायको हक अधिकार बञ्चित गर्दै धर्मनिरपेक्षता मास्ने सरकारको कार्यशैलि भएको भन्दै विरोध जनाएको छ ।
मुस्लिम समाजले आज विराटनगरमा पत्रकार सम्मेलन गरि सरकारले मुस्लिम समुदायलाई अन्याय गरेको भन्दै मोरङ मुस्लिम समाजले हक अधिकार सुनिश्चित तथा पुन स्थापित गराउन सरकारको ध्यानाकर्षण गराएको हो ।
सरकारले संविधानको मर्म विपरीत मुस्लिम समुदायका विदा कटौती गरी मुस्लिम समुदायलाई दोस्रो दर्जाको नागरिकको रुपमा हेरेको निष्कर्ष निकाल्दै मुस्लिम समाजले विदा तत्काल फिर्ता गर्न माग गरेको छ ।
समानुपातिक समावेशी सिद्धान्तको आधारमा सहभागिताको हक विपरीत राष्ट्रिय सभा र मन्त्रीमण्डलमा एकजना मुस्लिम पनि अटाउन नसक्नु गठबन्धन सरकारको मुस्लिम विरोधि भावना भएको मुस्लिम समाजको ठम्याई छ ।
मुस्लिम समाजले मुस्लिम समुदायका महान पर्वमा सार्वजनिक विदा घोषण गर्नुपर्ने, सरकारी तथा अर्धसरकारी निकायमा राजनितिक नियुक्ती गर्दा जनसंख्याको आधारमा मुस्लिम समुदायको पनि प्रतिनिधित्व गराउनु पर्ने लगायतका माग राख्दै आन्दोलनका कार्यक्रमहरु सार्वजनिक गरेको छ ।
पहिलो चरणको आन्दोलन अन्तर्गत यही जेठ ११ गते विराध सभागर्ने ,मुख्यमन्त्री सहित प्रधानमन्त्रीलाई माग सहितको ज्ञापन पत्र बुझाउने रहेको विज्ञप्तिमा उल्लेख छ ।
सरकारले यसपालि मुस्लिम समुदायका चाड ईद,बकरईद,हजरत महम्मद जयन्तीको विदा कटौती गरेको थियो ।
नेपालमा झण्डै साढे चार प्रतिशत मुस्लिम समुदाय रहेको २०६८ को जनगणनामा उल्लेख छ ।
