२७ साउन,एजेन्सी ।
चार्लोट एफसीमाथि फराकिलो जितका साथ इन्टर मायमी लिग्स कप २०२३ को सेमिफाइनलमा प्रवेश गरेको छ । कप्तान लिओनेल मेस्सीले लगातार पाँचौ खेलमा गोल गर्दै उत्कृृष्ट प्रदर्शन गर्दा इन्टर मायमीले ४–० को जितका साथ अन्तिम चारमा स्थान पक्का गरेको हो ।
घरेलु मैदानमा मायमीका लागि जोसेफ मार्टिनेज, रोबर्ट टेलर र लिओनेल मेस्सीले १–१ गोल गरे । अर्को गोल आत्मघाती गोल थियो । खेलको १२ औं मिनेटमा मार्टिनेजले पेनाल्टीमा गोल गर्दै मायमीलाई अग्रता दिलाए । ३२ औं मिनेटमा टेलरले प्रतियोगिताको चौथो गोल गरे ।
डेआन्द्रे यडलिनको पासलाई उनले पेनाल्टी क्षेत्र भित्रबाट गोलमा परिणत गरे । ७८ औं मिनेटमा अदिल्सन मालान्दाले आत्मघाती गोल गर्दा मायमी फाइनलनजिक पुगेको थियो । तर ४ मिनेट समय बाँकी रहँदा मेस्सीले प्रतियोगिताको आठौं गोल गरे ।
उनले जोसे काम्पानाको पासलाई पहिलो टचमै गोल गरेका थिए । मायमीले अब सेमिफाइनलमा फिलाडेल्फिया युनियन र क्वेरेटारोको विजेतासँग खेल्नेछ । अर्को क्वाटरफाइनलमा नाशभिलले मिनेसोटा युनाइटेडलाई ५–० ले हराएको थियो ।
नाशभिलले लास एन्जलस एफसी र मोन्टेरेको विजेतासँग सेमिफाइनलमा खेल्नेछ । यता इङ्ग्लिस प्रिमियर लिग फुटबलमा म्यानचेस्टर सिटीले विजयी सुरुवात गरेको छ । नयाँ सिजनको पहिलो खेलमा सिटीले बर्नलीलाई ३–० गोलले हरायो । सिटी साविक उपाधि विजेता टोली हो ।
गएराति बर्नलीको मैदान टर्फ मुरमा भएको खेलमा सिटीका इर्लिङ हालान्डले दुई तथा रोड्रीले एक गोल गरे । हालान्डले खेलको चौथो र ३६औँ मिनेटमा तथा रोड्रीले ७५औँ मिनेटमा गोल गरे । जितसँगै सिटीले पहिलो खेलबाट तीन अङ्क जोडेको छ ।
बर्नली प्रिमियर लिगमा यसै सिजन बढुवा भएको हो । सिटीले गएको सिजन युरोपियन च्याम्पियन्स लिग, प्रिमियर लिग र एफए कप गरी तीन वटा उपाधि जितेको थियो ।
सिटी एकै सिजन यी सबै उपाधि जित्ने दोस्रो टोली हो । यसअघि सन् १९९९ मा म्यानचेस्टर युनाइटेडले यी ३ वटै उपाधि जितेको थियो । प्रिमियर लिगमा आज ६ वटा खेल हुँदैछन् ।
