१९ भदौ , काठमाण्डौ ।
के मानिसले १५० वर्षसम्म सामान्य जीवन बिताउन सक्नछन् ? के मानिसको अमर हुने चाहाना कहिल्यै पूरा होला ? यो प्रश्न अहिले विश्वभर सोधिन थालिएको छ र यो एकाएक आएको पनि होइन । विश्वका दुई शक्तिशाली देशका शक्तिशाली नेताबीच अमर रहने विकल्पबारे कुराकानी भएपछि यसको विश्वभर चर्चा भइरहेको छ ।
बेजिंगमा चिनियाँ राष्ट्रपति सि जिंगपिङ र रूसी राष्ट्रपति भ्लादिमिर पुटिनले अमर रहने विकल्पबारे कुराकानी गरेको खुलेको छ । उनीहरुबीच भएको गोप्य कुराकानी माइक्रोफोनमा रेकर्ड भएपछि यो छलफल चर्किएको हो । बुधबार, जब भ्लादिमिर पुटिन चिनियाँ राष्ट्रपति सी जिनपिङसँग काँधमा काँध मिलाएर हिँडिरहेका थिए, लाइभ टेलिकास्ट माइकले उनीहरूको कुराकानी कैद गर्यो ।
जसमा दुवै नेताबीच मानव अंग प्रत्यारोपण र १५० वर्षसम्म मानिस बाँच्ने सम्भावनाबारे छलफल भएको थियो । बुधवार पुटिन, सी जिनपिङ र उत्तर कोरियाली तानाशाह किम जोङ उन दोस्रो विश्वयुद्ध समाप्त भएको ८० वर्षको सम्झनामा बेइजिङमा आयोजित सैन्य परेडमा हिँडिरहेका बेला उक्त कुराकानी रेकर्ड गरिएको थियो ।
चीनको राज्य प्रसारक सीसीटीभीले समाचार एजेन्सी एसोसिएटेड प्रेस र रोयटर्सको साथसाथै विश्वव्यापी मिडिया आउटलेटहरूमा घटनाको प्रत्यक्ष प्रसारण गरेको थियो । सीसीटीभीले यो कभरेजलाई टिभीमा ४० करोडभन्दा भन्दा बढी पटक हेरिएको बताएको छ ।
जबकि अनलाइनमा १.९ अर्ब पटक हेरिएको थियो । पुटिन र सी जिनपिङ तियानमिन स्क्वायरको मञ्चमा पुग्दा पुटिनका दोभाषेले चिनियाँ भाषामा भनेका छन्, ‘बायोटेक्नोलोजी निरन्तर विकास भइरहेको छ । मानव अंगहरू लगातार प्रत्यारोपण गर्न सकिन्छ । तपाईं जति लामो समय बाँच्नुहुन्छ, त्यति नै जवान रहनुहुनेछ र अमरता पनि प्राप्त गर्न सक्नुहुन्छ।’
यसको जवाफमा सी जिनपिङले भने, ‘केही मानिसहरु यस शताब्दीमा मानिस १५० वर्षसम्म बाँच्न सक्ने अनुमान गर्छन्।’ यस कुराकानीका क्रममा किम जोङ उन मुस्कुराउँदै पुटिन र सीलाई हेर्दै थिए । सीसीटीभीबाट प्रशारण भएको भिडियोमा पुटिनले रुसी भाषामा स्पष्ट रूपमा बोलेको सुन्न सकिँदैन । तर, पुटिनले पछि आफू र चिनियाँ राष्ट्रपतिबीच बुधबार यस विषयमा छलफल भएको पुष्टि गरे ।
बेइजिङमा पत्रकारहरूले लीक भएको कुराकानीबारे सोध्दा पुटिनले भने, ‘मलाई लाग्छ कि हामी परेड हेर्न गएका बेला अध्यक्षले यस विषयमा कुरा गर्नुभएको हो । स्वास्थ्य सुधारका आधुनिक साधनहरू, चिकित्सा उपकरणहरू, अंगहरू प्रतिस्थापन गर्ने शल्यक्रियाहरू पनि, मानवतालाई आशा दिन्छ कि सक्रिय जीवन आजको भन्दा फरक तरिकामा जारी रहनेछ।’
यसमा अमेरिकी पत्रिका द न्युयोर्क टाइम्सका अनुसार पुटिन र सीले कुराकानी गर्दा उनीहरूको माइक अन नै थियो । तर माइक अन छ भन्ने विषयमा पुटिन र सीले हेक्का नराखेको भनिएको छ । सीले अहिलेको प्रविधिको युगमा ७० वर्षको मान्छे पनि बच्चै हुने बताएका थिए ।
’उहिले मानिसहरू मुस्किलले ७० वर्ष बाँच्थे। तर यो आधुनिक समयमा ७० वर्षमा पनि बच्चा नै हो,’ उनले भनेका थिए । जबाफमा पुटिनले मानव अंग प्रत्यारोपण गरी मानिसलाई अमर बनाउन सकिने भनेका थिए । ’स्वास्थ्य विज्ञानसम्बन्धी प्रविधि धेरै विकसित भइसक्यो। तत्काल मानव अंग प्रत्यारोपण गर्न सकिन्छ।अंग प्रत्यारोपणले मानिसहरूलाई उनीहरूको उमेरभन्दा कमको देखाउँछ। अमरत्व नै पनि सम्भव हुन सक्छ,’ पुटिनले भनेका थिए ।
त्यसपछि सीले चाँडै नै मानिसहरूलाई १५० वर्षसम्म बाँच्न सक्ने र त्यो अनुसारको प्रविधिको विकास गर्न सकिने बताएका थिए । दुवै जनाले अनुवादकमार्फत एक अर्कालाई आफूले भन्न खोजेको कुरा बुझाइरहेका थिए । एकै लहरमा हिँडेका उत्तर कोरियाली नेता किम जोङले पनि उनीहरुको कुरालाई आफ्नो अनुवादकमार्फत बुझिरहेका थिए ।
किमले उनीहरूको कुरा चासो दिएर सुने पनि कुनै प्रतिक्रिया दिएनन् । दीर्घजीवनबारे पछिल्लो समय पुटिनले अत्यधिक चासो देखाउँदै आएका छन्। उनले आफ्नो स्वास्थ्य मन्त्रालयलाई जीवन बढाउने विषयलाई मुख्य प्राथमिकता दिन निर्देशन दिएका छन् ।
रूसको प्रमुख ऊर्जा कम्पनी रोसआटमले अघिल्लो वर्ष मानव अङ्ग ’प्रिन्ट’ गर्ने प्रविधि विकास गरिरहेको जनाएको भनेर न्युयोर्क टाइम्सले लेखेको छ । तर वैज्ञानिकहरूले अंग प्रतिस्थापनमार्फत मात्र जीवन दीर्घ बनाउन सकिने कुनै प्रमाण नभएको बताएका छन् ।
मानवीय मस्तिष्क भने उमेरसँगै प्राकृतिक रूपमा परिवर्तन भइरहने भएकाले त्यसको विकल्प नभएको भनिएको छ । पुटिन र सी दुवै ७२ वर्षका भए । यो संवादले उनीहरूमा अझै लामो समयसम्म सत्तामा रहने चाहना रहेको संकेत गरेको विभिन्न अन्तर्राष्ट्रिय सञ्चारमाध्यमहरूले उल्लेख गरेका छन् ।
चीनका शासकहरू सामान्यतया लामो समयसम्म बाँचेका छन् । अघिल्ला नेता देङ स्याओपिङको ९२ वर्षको उमेरमा निधन भएका थिए भने उनका उत्तराधिकारी च्याङ चेमिन ९६ वर्षसम्म बाँचेका थिए । पुटिनले भने २०२० मा संविधान संशोधन गरी सन् २०३६ सम्म सत्तामा रहन सक्ने व्यवस्था मिलाएका छन्।
त्यतिबेला उनको उमेर ८३ वर्ष पुग्नेछ । कोभिड–१९ महामारीका बेला उनले आफूलाई भेट्न चाहनेहरूलाई दुई सातासम्म क्वारेन्टिनमा बस्नुपर्ने शर्तसमेत लगाएका थिए । यसले पनि उनको स्वास्थ्यप्रतिको असाधारण ध्यान रहेको देखाउँछ ।
