११ वैशाख, एजेन्सी ।
उत्तर अफ्रिकी मुलुक सुडानमा शक्ति संघर्षका लागि सेना र अर्धसैनिक बलका प्रमुखबीचको तनाव ठूलो लडाँइमा परिणत भएको छ । गत साताको शनिबार सुरु भएको द्धन्द्धमा अहिलेसम्म ४०० भन्दा बढी मारिएका छन् भने सयौं घाइते भएका छन् ।
द्वन्द्व चर्किएपछि विश्वका विभिन्न देशले आफ्ना नागरिकलाई त्यहाँबाट बाहिर निकाल्न थालेका छन् ।अमेरिका र बेलायतले सुडानको राजधानी खार्तुमबाट आफ्ना कुटनीतिज्ञ र उनीहरुको परिवारलाई बाहिर निकालेको जनाएको छ ।
यस्तै, फ्रान्स, जर्मनी, इटली र स्पेनले पनि द्वन्द्वग्रस्त सुडानबाट आफ्ना नागरिकलाई स्वदेश ल्याउने व्यवस्था गरेको बताएका छन् । भारतले पनि खार्तुममा रहेका आफ्ना नागरिकको उद्धार गर्न सबै तयारी पूरा भएको जनाएको छ ।
नेपालले पनि सुडानमा युद्ध सुरु भएसँगै त्यहाँ रहेका नेपालीहरूबारे विवरण संकलन गर्न सुरु गरेको परराष्ट्र मन्त्रालयले जनाएको छ । सुडानमा नेपाली सेनाको शान्ति मिसन समेत रहेको छ । संयुक्त राष्ट्र संघको सुडान मिसनअन्तर्गत त्यहाँ शान्ति स्थापनाका लागि ६ जना सैनिक रहेको नेपाली सेनाले जनाएको छ ।
राष्ट्र संघीय मिसनले नै नेपालसहित त्यहाँ रहेका सेनाहरूको उद्धारको तयारी गरिरहेको नेपाली सेनाका प्रवक्ता ब्रिगेडियर जनरल कृष्णप्रसाद भण्डारीले बताएका छन् । सोहीअनुसार आइतबार नै नेपाली शान्ति सैनिक छिमेकी मुलुकहरूमा गएको उनले बताए ।
परराष्ट्र मन्त्रालयकी प्रवक्ता सेवा लम्सालले त्यहाँ रहेका नेपालीहरूको विवरण संकलन भइरहेको बताएकी छन् । लम्सालले सुडानमा विभिन्न संस्थाहरूमा काम गर्ने नेपाली र अन्य नेपालीको संख्या कति छ भन्ने एकिन भइनसकेको जानकारी दिइन् ।
त्यहाँ रहेका नेपालीहरूले आफ्नो स्थितिबारे जानकारी दिएपछि समस्यामा परेकाहरूको उद्धारका लागि सोहीअनुसार काम थाल्ने परराष्ट्रको भनाइ छ ।
