२० कार्तिक , काठमाण्डौ ।
अभिब्यक्तिकै आधारमा डा. निकोलस भुसाल पक्राउ परेपछि जेनजी अगुवाहरु सरकारमाथि खनिएका छन् । जेनजी अभियन्ता सुदन गुरुङले गृहमन्त्री ओमप्रकाश अर्यालको विरोध गर्दै निकोलस भुसाल र एमाले नेता महेश बस्नेतलाई किन फरक तरिकाले हेरेको भनी प्रश्न गरेका छन् ।
उनले सामाजिक सञ्जालमार्फत् यस्तो बताएका हुन् । जेनजी अभियन्ता भावना राउतले सामाजिक सञ्जालमा राखेका धारणालाई गुरुङले पनि समर्थन गर्दै यस्तो प्रश्न गरेका छन् । “निकोलस भुसाल र महेश बस्नेतको अभिव्यक्तिमा आखिर फरक के देख्नुभयो गृहमन्त्रीज्यू ? अनि किन निकोलसमात्रै पक्राउ परे ? कि शक्तिशालीलाई नछुने ओली सरकारकै पारामा ढल्किनुभएको हो ? बन्द कोठामा प्रश्न गर्दा गर्दा थाकेर आएको अभिव्यक्ति हो यो । लाग्छ आन्दोलन हार्दैछ ।” भावना राउत र सुधन गुरुङले सामाजिक सञ्जालमा यसरी प्रश्न गरेपछि जेनजी अभियन्ताहरुले पनि त्यसलाई समर्थन गरेका छन् ।
सार्वजनिक शान्ति सुरक्षामा खलल पुर्याएको अभियोगमा गोरखाबाट पक्राउ परेका डा.निकोलस भुसाल पाँच दिन हिरासतमा रहने गरी अदालतले अनुमति दिइसकेको छ । काठमाडौं जिल्ला अदालतले उनलाई पाँच दिन हिरासतमा राखेर अनुसन्धान गर्न प्रहरीलाई अनुमति दिएको हो ।
५ दिन अघि उनले माइतीघरमा प्रदर्शनको आव्हान गरेका थिए । तर, उनी भने आएनन् । आफूलाई प्रहरीले खोजेपछि उनले आफू काठमाडौंमै रहेको भन्दै भिडियो सन्देश समेत जारी गरेका थिए । तर उनी गोरखाबाट पक्राउ परेका हुन् ।
उनी गोरखा नगरपालिका–८ सरस्वति आश्रमबाट पक्राउ परे । उनलाई त्यसपछि हिजो नै प्रहरीले काठमाडौं ल्याएको थियो । प्रधानमन्त्री सुशीला कार्की, गृहमन्त्री ओमप्रकाश अर्याल, काठमाडौं महानगरपालिकाका मेयर बालेन शाह लगायतको नाम लिँदै भुसालले हिंसात्मक अभिव्यक्ति दिएका थिए ।
उनले तत्कालीन प्रधानमन्त्री केपी शर्मा ओली र गृहमन्त्री रमेश लेखक विरुद्ध पनि अराजक अभिव्यक्ति दिएका छन् । भुसालले शनिवार सम्वाद डबलीमा पत्रकार सम्मेलन गरेका थिए । त्यहाँ उनले गत भदौ २३ गते जेनजी आन्दोलनमा दमन भएको भन्दै तत्कालीन प्रधानमन्त्री ओली र तत्कालीन गृहमन्त्री लेखकलाई हत्याराको संज्ञा दिए ।
जेनजी आन्दोलनका क्रममा भदौ २३ गते एकैदिन सुरक्षाकर्मीको गोली लागेर १९ जनाको मृत्यु भएको थियो । यसमा तत्कालीन प्रधानमन्त्री ओली र तत्कालीन गृहमन्त्री लेखकको भूमिका रहेको उनको आरोप छ ।
उनीहरुलाई सरकारले कारबाही नगरे आफूहरु नै कारबाहीका लागि अगाडि सर्ने समेत बताए । ‘कारबाही’का लागि आफूहरु ओली र लेखकको घर जाने उनले बताएका छन् । सरकारले तत्कालीन प्रधानमन्त्री र गृहमन्त्रीलाई कारबाही नगरेको भन्दै भुसाल हालका प्रधानमन्त्री कार्की र गृहमन्त्री अर्यालविरुद्ध पनि खनिए ।
उनले वर्तमान प्रधानमन्त्री सुशीला कार्कीलाई ‘हुतिहारा’ भनेर टिप्पणी गरेका छन् । यस्तै निकोसल भुसालको पक्राउ प्रहरीको उचित कदम भएको भन्दै महेश बस्नेतले खुशी ब्यक्त गरेका छन् । उनले लेखेका छन्, स्वतन्त्रता होइन, अभद्रता र अराजकता रोक्न कानूनले हस्तक्षेप गर्नै पर्छ।मर्यादा बिनाको अभिव्यक्ति स्वतत्न्त्राता को नामको अराजकता हो । प्रहरीलाई धन्यवाद ।
यता जेनजी अभियन्ता रक्षा बमले निहत्था विद्यार्थीहरूमाथि गोली बर्साउन आदेश दिने तानाशाहले चुट्किला सुनाएर दुनियाँ हसाईरहेको भन्दै असन्तुष्टि जनाएकी छिन् । कसैको नाम उल्लेख नगरी उनले लेखेकी छिन्, ’निहत्था विद्यार्थीहरूमाथि गोली बर्साउने आदेश दिने तानाशाह खुलेआम घुम्दै छ। अन्तरवार्ता दिदैछ।
अझै पनि चुट्किला सुनाएर दुनियाँ हसाईरहेको छ। मानिसहरू उसको चुट्किला सुनेर ताली पिटिरहेका छन् । खासमा मानिसहरू चुट्किलामा ताली बजाइरहेका छैनन्, उनीहरू त निरङ्कुश तानाशाहको हर्षबढाई गरिरहेका छन् ।’
’दिक्क लाग्छ, अचम्म लाग्छ। यो अट्टहासको साक्षी कसरी बस्न सकेका होलान् मानिसहरू ? एउटा दम्भी तानाशाहको भाषणमा ताली बजाएर घर फर्किएकाहरू आफ्नो वरिपरि हुर्किरहेका ज्यानजीहरूसँग आँखा जुधाएर कुरा गर्न पो कसरी सकिरहेका होलान् ?’उनले भनेकी छिन् ।
उनले चेतावनी दिँदै भनेकी छिन्, ’हाम्रा साथीहरूको रगत सडकमा अझै सुकेको छैन। चिसो रातहरूमा घाइते साथीहरूको शरीर झन् बढी कटकट्याएर दुखिरहेको छ। ती प्रत्येक रगतका थोपाले न्याय पाउनै पर्छ। यी चिसा रातहरूमा नओभाई निदाउन सङ्घर्षरत आमाहरूका आँखाले न्याय पाउनै पर्छ। दुखिरहेका प्रत्येक घाउहरूले न्याय पाउनै पर्छ । हामी हाम्रो खातिर न्याय कुरिरहेका छौँ।’
