१५ चैत ,काठमाण्डौ ।
आज फेरि सुनले अहिलेसम्मकै उच्च मूल्यको रेकर्ड कायम गरेको छ । प्रतितोला एक हजार चारसय रुपैयाँ बढेर सुनको मूल्यले आज अहिलेसम्मकै उच्च मूल्यको रेकर्ड बनाएको हो ।
सुनको मूल्य आज प्रतितोला एक लाख ७६ हजार दुईसय रुपैयाँ पुगेको छ । यो अहिलेसम्मकै सबैभन्दा महँगो मूल्य हो । यसअघि यही चैत ६ गते सुनको मूल्य एक लाख ७६ हजार रुपैयाँ पुगेर घटेको थियो ।
हिजो बढेको सुनचाँदीकै मूल्य आज पनि बढेको नेपाल सुनचाँदी व्यवसायी महासंघले जनाएको छ । हिजो सुनको मूल्य प्रतितोला एक हजार तीनसय रुपैयाँ बढेर एकलाख ७४ हजार आठसय रुपैयाँ पुगेको थियो ।
गएको बुधबार पनि सुनको मूल्य प्रतितोला दुईसय रुपैयाँ बढेको थियो । गत साताको शुक्रबारदेखि मंगलबारसम्म सुनको मूल्य लगातार घटेको थियो । त्यसयताका तीन दिन भने लगातार सुनको मूल्य बढिरहेको छ ।
महासंघका अनुसार आज चाँदीको मूल्य पनि प्रतितोला २० रुपैयाँ बढेको छ । चाँदीको मूल्य आज तोलाको दुई हजार ४० रुपैयाँ पुगेको महासंघले जनाएको छ । गएको मंसिर तेस्रो साता सुनको मूल्य दुई दिनमै तोलामा साढे १८ हजार रुपैयाँ घटेको थियो ।
त्यतिबेला सरकारले भन्सारदर घटाएपछि व्यापक घटेको सुनचाँदीको भाउ फेरि बढेको थियो । घरेलु बजारमा मात्रै होइन, अन्तर्राष्ट्रिय बजारसमेत सुनको भाउ उकालो लागिरहेको छ ।
यो वर्ष सुनको मूल्यले १७ पटकसम्म अल हाइम हाईको उचाई चुमेको छ । बढ्दो मूल्यवृद्धिलाई मध्यनजर गर्दै विश्लेषकहरुले छिट्टै नै सुनको मूल्य प्रतिऔंस ३१ सय डलर पुग्ने आँकलन गरेका छन् ।
अमेरिकी राष्ट्रपति डोनाल्ड ट्रम्पले व्यापारका विभिन्न क्षेत्रमा ट्यारिफको घोषणा गरेसँगै बढेको अनिश्चितताका कारण सुनमा लगानी गर्नेको संख्या बढेको छ । ट्रम्पले हालैमात्रै अप्रिल २ देखि अमेरिका आयात हुने सवारी साधन तथा पाट्सहरुमा २५ प्रतिशत ट्यारिफको घोषणा गरेका छन् ।
यसअघि उनले क्यानडा, मेक्सिको र चीन जस्ता देशहरुमाथि पनि करको घोषणा गरेका थिए । यी देशहरुले समेत अमेरिकामाथि ट्यारिफ लगाउने बताएका छन् । जसका कारण विश्व व्यापारको कालो बादल मडारिएको छ ।
यस्तै विश्वका केन्द्रीय बैंकहरुले समेत सुनको भण्डारण बढाएका छन् । जसका कारण माग बढ्दा मूल्य उकालो लागेको विश्लेषकले बताएका छन् । विश्वमा आर्थिक र राजनीतिक संकट बढ्दा सुनलाई सुरक्षित लगानीको रुपमा लिइन्छ र कम ब्याजयुक्त वातावरणमा यसको मूल्य फस्टाउने गर्छ ।
