२८ फागुन , काठमाण्डौ ।
आगामी आर्थिक वर्षको बजेटको प्राथमिकता समेत संसदमा टेबल भइसकेको अवस्थामा अर्थमन्त्रालयको दोस्रो पटक जिम्मेवारी सम्हाल्ने अवसर पाएका अर्थमन्त्री वर्षमान पुनले पुँजी बजारमा सुधारका लागि नीतिगत कदम चाल्ने संकेत गरेका छन् । अर्थमन्त्रीको पदभार ग्रहण गरेलगत्तै सेयर बजारका लगानीकर्तालाई ढुक्कसँग लगानी गर्न आग्रह गरेका मन्त्री पुनले पुँजी बजारमा देखिएको समस्या समाधान गर्न नियामक निकायसँग सुझाव मागेका छन् ।
अर्थमन्त्रालयले धितोपत्र बोर्ड, नेपाल स्टक एक्सचेञ्ज (नेप्से) र सिडिएससीसँग बजारमा देखिएका समस्या समाधान गर्न सुझाव मागेका छन् । सुझाव ७ दिनमा पठाउन भनिएको छ । ‘देशको अर्थतन्त्रको विकासमा महत्वपूर्ण भूमिका खेल्ने पुँजी बजारमा देखिएका समस्या समाधान एंव त्यस क्षेत्रको विकास र विस्तारका लागि तत्काल गर्नुपर्ने कामहरुको सम्बन्धमा सम्बन्धित सरोकारवालाहरुको राय समेत लिई ७ दिनभित्र कार्ययोजना पेश गर्नुहुुन माननीय मन्त्रिज्यूको निर्देशानुसार अनुरोध छ’ पत्रमा भनिएको छ ।
मन्त्री पुनले बोर्ड, नेप्से, सिडिएससीसँग सुझाव मागेको भएपनि ब्रोकर, लगानीकर्तासँग भने सुझाव मागेका छैनन् । बजार सुधारका लागि बोर्ड, नेप्से, सिडिएससीसँगै लगानीकर्ता, ब्रोकरको सुझाव पनि महत्वपूर्ण हुने लगानीकर्ता बताउँछन् । नवनियुक्त अर्थमन्त्री वर्षमान पुनले पदभार ग्रहण गरेलगत्तै सेयर बजारमा भएका नीतिगत विषयलाई करेक्सन गरेर अगाडि बढ्ने बताएका छन् ।
गत बुधबार अर्थ मन्त्रालयमा पदभार ग्रहण गर्दै मन्त्री पुनले अहिले प्यानिक रहेका सेयर लगानीकर्तालाई राहत हुने काम गर्ने जानकारी गराएका थिए । मन्त्री पुनले ६० लाख सेयर लगानीकर्ताको हितमा काम गर्ने जानकारी गराए । अहिलेको अवस्थामा लगानीकर्ताको मनोवल बढाउने काम गर्नुपर्ने उनको तर्क छ । ‘सेयर बजारमा बेलाबेला तलमाथि भइरहन्छ ।
सेयर बजारमा भएका समस्याहरूलाई संरचनागत तथा नीतिगत रूपले सुधार गर्नुपर्छ । त्यहाँ ६० लाखभन्दा धेरै ग्राहकहरू, सेयर होल्डरहरू रहेको अवस्था छ’ उनले भनेका थिए ‘यो क्षेत्र ६० लाखको काम व्यवहार र भविष्यसँग जोडिएको क्षेत्र हो ।’ पुनले अर्थमन्त्रालय सम्हालेदेखि सेयर बजार उकालो लागिरहेको छ ।
लगानीकर्ताले माओवादी नेतृत्वलाई अनुदार मान्दै आएको पृष्ठभूमि र दुई वर्षयता नेप्से १८,०० र २,००० विन्दुमा घुमिरहेको पृष्ठभूमिमा अर्थमन्त्री पुनमाथि बजारमा सुधारको कदम चाल्नु पर्ने दबाव छ । बजारप्रति नरम भनिने नेपाली काँग्रेसका नेता डा. प्रकाशशरण महत ११ महिना अर्थ मन्त्रालय सम्हाल्दा सुधारका कदम चाल्न नसकेर लगानीकर्तामाझ आलोचित भएकामा पुनले जस लिने चाहेको पनि देखिन्छ ।
उनले अर्थतन्त्र चलायमान बनाउन मात्र नभएर, सेयर बजारमैत्री नीतिका लागि गर्भनर महाप्रसाद अधिकारीसंग पनि छलफल थालिसकेका छन् । दोस्रो पटक अर्थमन्त्री बनेका पुनलाई बजारले स्वागत गरिसकेको छ । उनी बुधबार अर्थमन्त्रीमा नियुक्त भएका थिए । त्यो दिन उतारचढाव देखिएको बजार अर्थमन्त्रीमा पुन आउने निश्चित भएपछि अन्तिम क्षणमा ९.३३ अंकले बढेको थियो ।
नेप्से त्यसको भोलिपल्ट विहीबार १३.५१ र आइतबार २२.१० अंकले बढेर २०५२.६५ को विन्दुमा पुगेको थियो । आफू आएपछि नेप्से लगातार बढ्नुलाई मन्त्री पुनले पनि लगानीकर्ताले गरेको भरोसामा रुपमा लिएका छन् । गठबन्धनको समीकरण परिवर्तनलाई भने बजारले अत्याधिक स्वागत गरेको थियो । फागुन २१ गते तेस्रो पटक सकारात्मक सर्किट लागेर ११७ अंकले बढेर बजार बन्द भएको थियो ।
