४ पुस, काठमाडौँ ।
सेयर खरिदबिक्रीमा ब्रोकरको कमिसन घटाउन अर्थमन्त्री विष्णु पौडेलले निर्देशन दिएका छन् ।
शुक्रबार धितोपत्र बोर्डका पदाधिकारीसँगको छलफलमा अर्थमन्त्रीले यस्तो निर्देशन दिएका हुन् । सेयर कारोबारमा ब्रोकरलाई तिर्नुपर्ने शुल्क बढी भएको भन्दै घटाउन लगानीकर्ताले माग गरिरहेको समयमा अर्थमन्त्रीबाट यस्तो निर्देशन आएको हो ।
हाल सेयर कारोबारमा लगानीकर्ताले ब्रोकरलाई ०.४ देखि ०.६ प्रतिशतसम्म शुल्क तिर्नुपर्ने व्यवस्था छ । धितोपत्र बोर्डले ब्रोकरको शुल्क घटाउन आन्तरिक गृहकार्य थालिसकेको छ । सोही क्रममा कमिसन के–कति बनाउने भन्ने सम्बन्धमा एक अध्ययन पनि भइसकेको छ ।
गत भदौमै तयार भइसकेको अध्ययन प्रतिवेदनलाई थप सान्दर्भिक बनाउन अहिले पुनः अध्ययन सुरु भएको स्रोतले बताएको छ । ‘ब्रोकरहरूको स्थिर र परिवर्तनशील लागत के–कति लाग्छ, त्यसका आधारमा कति शुल्क तय गर्दा ठीक हुन्छ अब ती पक्ष पनि हेरिनेछ,’ स्रोतले भन्यो ।
‘ब्रोकर कमिसन घटाउन विलम्ब नगर्न अर्थमन्त्री पौडेलले जोड दिए । ‘यसमा प्रोएक्टिभ भएर लाग्नुहोस्,’ उनले भने । पुँजी बजारको विकास तथा विस्तार भइरहेकाले विद्यमान समयमा समयतालिका बनाएर समाधान गर्न उनले निर्देशन दिए ।
‘पुँजी बजारको विकासका लागि चालु आर्थिक वर्षको बजेटमा उल्लिखित कार्य समयमा सम्पन्न गर्नुहोस्,’ मन्त्री पौडेलले भने, ‘यसका लागि विद्यमान ऐन, नियम परिमार्जन गर्नुपर्ने भए त्यो पनि गर्नुहोस् ।’
लकडाउनपछि खुलेको बजारमा नेप्से परिसूचकसँगै कारोबार रकम पनि बढेको छ ।
