१० मंसिर, काठमाडाैँ ।
सवारी चालकका लागि सवारी चालक अनुमति पत्र स्मार्ट लाइसेन्स वितरण सुरु गरेको सरकारले गएको फागुन देखि चालकहरुलाई लाइसेन्स वितरण गर्न सकेको छैन् । लाईसेन्स छपाईका लागि कार्ड नभएपछि २०७७ फागुनदेखि लाइसेन्सको छपाइ र वितरण ठप्प छ । विदेश जानुपर्ने अत्यावश्यक बाहेकका सेवाग्राहीलाई यातायात व्यवस्था विभागले एक वर्षदेखि लाइसेन्स छापेर दिन सकेको छैन ।
आपूर्तिमा लापरबाही र ढिलाइ हुँदा लाइसेन्स परीक्षा नै हुन सकेको थिएन भने निषेधाज्ञाको अवधिमा लाइसेन्स छपाइ समेत रोकिएको थियो । अहिले करिब ७ लाख सवारी चालकहरु लाइसेन्स परीक्षा पास तथा नवीकरणको प्रक्रिया पुरा गरेर स्मार्ट लाइसेन्स कुरिरहेका छन् । यस्तै कोरोनापछि खुलेको लाइसेन्सको परीक्षाबाट थप चालकहरु लाइसेन्स लिनका लागि पखाईमा छन् । अहिले फ्रान्सको सेल्प कम्पनीले ठेक्का सम्झौताअनुसार यातायात व्यवस्था विभागमा १४ लाख स्मार्ट लाइसेन्स छाप्ने कार्ड आपूर्ति भएको छ । हालै छपाइका लागि कार्ड आएपनि विभागले तुरुन्तै छपाइ थालिहाल्ने अवस्था भने छैन ।
विभागका निर्देशक रामचन्द्र पौडेल सेल्पले आपूर्ति गरेको कार्ड विभागले दिएको स्पेसिफिकसेन अनुसार भए÷नभएको भन्नेबारे जाँच गर्न बाँकी नै छ । कार्डको मापदण्ड र गुणस्तर जाँच गर्न कसलाई दिने भन्नेबारे पनि अहिलेसम्म विभाग अनिर्णित छ । निर्देशक पौडेलका अनुसार सम्भावित कम्पनीको सूची बनाएर प्रक्रियाअनुसार छनोट हुने कम्पनीको कार्ड परीक्षण गराइने बताउँछन् । त्यसका लागि कार्डको स्याम्पल विदेशी कम्पनीमा पठाउनुपर्ने हुन्छ । अहिलेसम्म विभागले वितरण गर्ने कार्ड भारतको मद्रास सेक्युरिटी प्रिन्टर्सले आपूर्ति गर्दै आएको थियो ।
सेल्पले आपूर्ति गर्ने कार्ड छपाइका लागि मद्रासले यतिबेलासम्म सफ्टवेयरमा परिवर्तनको काम सकिसक्नुपर्ने थियो तर आफूले पाउँदै आएको ठेक्का यसपटक फरक कम्पनीले पाएपछि मद्रासले प्रणाली सुधारको काममा लामो समयसम्म चासो दिएको थिएन । तर, सरकारले कालोसूचीमा राख्ने चेतावनी दिएपछि मद्रासले प्रणालीमा आवश्यक परिवर्तनको काम गरिरहेको विभागको दावी छ । तर, अहिलेसम्म मद्रासको प्रणालीमा सेल्पको कार्डमाथि लाइसेन्स छपाइ कति सहज हुन्छ भन्ने पनि टुंगो भने छैन ।
विभागले डेढ वर्षअघि ल्याएको नयाँ मेसिनले प्रतिघण्टा ४५० वटासम्म लाइसेन्स प्रिन्ट गर्न सक्छ । दैनिक २१ घण्टा चलाए नौ हजार वटासम्म कार्ड छाप्न सकिन्छ । त्यसरी महिनामा साढे दुई लाख लाइसेन्स छाप्न सकिन्छ । अहिले करिब ७ लाख लाइसेन्स वितरण गर्न बाँकी छ । अहिले दैनिक लाइसेन्सको परीक्षाका लागि फारम भर्नेहरु बढिरहेका छन् । देशभर दैनिक दुई हजारदेखि २५ सयसम्म चालकले लाइसेन्स प्रक्रिया पुरा गर्छन् । विभागका अनुसार अहिले वर्षमा सात लाखदेखि १० लाख वटासम्म लाइसेन्स वितरण गर्नुपर्छ । विभागले धेरै आवेदन आएपछि अहिले कार्यालय समयबाहेक बिहान र बेलुका मात्र लाइसेन्सको आवेदन लिइरहेको छ ।