९ भदौ,विराटनगर ।
समुदाय–प्रहरी साझेदारी कार्यक्रमलाई थप प्रभावकारी बनाएर लैजानुपर्ने सरोकारवालाले बताएका छन् । जिल्ला प्रहरी कार्यालय मोरङमा सोमबार आयोजित जिल्ला समितिको बैठकमा सहभागिहरुले यस्तो सुझाव दिएका हुन् ।
मोरङका प्रमुख जिल्ला अधिकारी रमेशकुमार केसीले सामाजिक संरचना लगायतका कारण फौजदारी अपराध बढेको बताउदै त्यसलाई न्युकिरण गर्न समुदायसंग साझेदारी आवश्यक रहेको बताए ।
एक जना प्रहरीले हाल ८ सय जनाको सुरक्षा गर्नु परिरहेको बताउदै उनले १ जना प्रहरीको दरबन्दी थप्दा राज्यले २ करोडको दायित्व वहन गर्नुपर्ने अवस्था रहेको बताए । नयां दरबन्दी थप्नु भन्दा पनि समुदाय र प्रहरी मिलेर सहकार्य गरे प्रभावकारी हुने उनले बताए ।
जिल्ला समन्वय समितिका मोरङका प्रमुख नरेश पोखरेलले प्रहरी प्रशासनले मात्र शान्ति सुरक्षा कायम हुन नसक्ने बताउदै नागरिक समाज र समुदायको भूमिका महत्वपूर्ण भएको बताए । अपराध न्युनिकरण गर्न नागरिकसंग प्रहरी साझेदारी आवश्यक रहेको बताउदै उनले समुदायप्रहरी साझेदारी कार्यक्रमलाई थप गतिशिल र ब्यापक बनाएर लैजानुपर्ने सुझाव दिए ।
विराटनगर महानगरपालिकाका प्रमुख भीम पराजुलीले समुदायसंग सहकार्य गर्दै प्रबिधि मैत्री भएर प्रहरी अघि बढनुपर्ने सुझाव दिए । प्रदेश १ प्रहरी प्रमुख ठाकुरप्रसाद ज्ञवालीको सहभागितामा भएको कार्यक्रममा विभिन्न सरोकारवालाको उपस्थिति थियो ।
