१२ जेठ, विराटनगर ।
कोशी प्रदेशको राजधानी तथा प्रदेशको एक मात्र महानगरपालिका विराटनगर महानगरपालिकाले आफ्नो लोगो सार्वजनिक गरेको छ। विराटनगर महानगरपालिकाले आफ्नो पहिचान दिलाउने छुट्टै लोगो बनाएको हो । सार्वजनिक सूचना आह्वान गरेर सर्वसाधारणबाट लोगोको ‘डिजाइन’ माग गरिएको थियो ।
विहीबार साँझ महानगरले एक कार्यक्रम गरी प्राप्त भएका १५८ मध्ये नरकुमार श्रेष्ठले डिजाइन गरेको लोगो छनोट गरेको हो । छनोट गर्न उपमेयर शिल्पा निराला कार्कीको संयोकत्वमा चार सदस्यीय समिति गठन भएको थियो । श्रेष्ठले डिजाइन गरेको लोगोमा नेपालको नक्सा, विराटनगरमा भएका विभिन्न राजीनिक आन्दोलनको चित्र, विराट राजाको दरबार, राधाकृष्ण रथयात्रा, विमानस्थललगायत विराटनगरलाई चिनाउने संकेत समेटिएको छ ।
तर लोगो सार्वजनिक भएसँगै सामाजिक संजालमा यसको प्रशंसा भन्दा आलोचना बढी भएको छ । अधिकांशले महानगरको लोगो अत्यन्त भद्धा तथा बुझ्नै नसकिने भएको प्रतिक्रिया जनाएका छन् । लोगोले विराटनगरको प्रतिनिधित्व नगरेको धेरैको प्रतिक्रिया रहेको छ ।
महानगरका मेयर नागेश कोइरालाको सचिवालयले सामाजिक संजालमा राखेको लोगोको प्रतिक्रियामा पनि अधिकांशले लोगो मन नपरेको प्रतिक्रिया दिएका छन् । ओम श्रेष्ठ लेख्छन्, मलाई त यो लोगो मन परेन। लोगो भनेको त प्रतिकात्मक सकेसम्म एउटै चिन्ह सबैले बुझ्ने किसिमको पो हुनु पर्छ, फेरि यो सम्बन्धी बिराटनगरको सर्वसाधारण जनताको जानकारी बिना कुन चैं बिषेशज्ञले खिचडी प्रकारको बनाएको हो ? यो बनाउने र पास गर्नेहरु नै जानुन , तर यसले बिराटनगरको प्रतिनिधित्व चैं गर्दैन है ।
यस्तै पेशल ढुङ्गेल लेख्छने फेद न टुप्पो को । लोगोको बारेमा मनिषा ब।ाल लेख्छिन्, यस्तो पनि लागो हुन्छ ? नर्सरी क्लासको बच्चाले बरु यो भन्दा राम्रो ड्रईङ गर्दछ । पक्कै जोगबनीको बोर्डरमा बसेर बनाएको हुनुपर्दछ ।
लोगोको बारेमा निरज शर्माले लेखेका छन् इन्डियाको लाल किल्ला पो छ त । लोगोका बारेमा बन्दना निरौलाले लेखेकी छन्, लोगो मेयर साप उपमेयर सापले आफ्नै छोरा छोरीलाई बनाउन दिएको जस्तो छ त । कर्ण अशोक लेख्छन् यो विराटनगर महानगरपालिकाको लोगो हो कि पाकिस्तान नगरपालिका हो ?
यस्तै सामाजिक संजालमा प्रकाश रायामाझीले लोगो राखेर लेखेका छन्, बिराटनगर महानगरपालिकाको यो लोगो बाट माथिको मंदिर हटाउदा चाहिँ पुरै सुन्दर देखिने रैछ। उर्दु भाषा पनि छुटेछ। महानगरको बिहीबार लोगो सार्वजनिक तथा जनप्रतिनिधिको कार्यभार एक वर्ष पूरा भएको अवसरमा आयोजित पत्रकार भेटमा मेयर नागेश कोईरालाले वितेको वर्ष महानगरको सरसफाईमा केन्द्रित भएको बताए।
उनले महानगरको पहिचान दिलाउने गरी पहिलो पटक आफ्नै लोगो निर्माण गरेको बताए । महानगरको लोगो सार्वजनिक गर्दै उपमेयर शिल्पा कार्कीले लोगोमा नेपालको नक्सा, विराटनगरमा भएका आन्दोलन, विराट राजाको दरबार, राधाकृष्ण रथयात्रा, विमानस्थललगायतलाई समेटेर बनाइएको बताइन् । लोगो डिजाईन गरेका श्रेष्ठले एक लाख रूपैया पारिश्रमिक हात पारेका छन् ।
