९ कात्तिक, एजेन्सी ।
विश्व प्रसिद्ध टि२० फ्रेन्चाइज लिग इन्डियन प्रिमियर लिग (आइपिएल) मा अर्को सिजनबाट लखनउ र अहमदाबादको टोली थपिने भएको छ ।आरपी संजिव गोएंका समूह (आरपीएसजी)ले ७ हजार ९० करोड भारतीय रुपैयाँमा लखनउ फ्रेन्चाइज खरिद गर्दा सिभिसीले अहमदाबाद खरिद गर्न ५ हजार ६ सय २५ करोड भारतीय रुपैयाँ खर्चेको छ । सोमबार सम्पन्न ६ घण्टा लामो बोलकबोलपछि आरपीएसजी र सिभिसीले टोली खरिद गरेका हुन् ।
आरपीएसजीले तिरेको मूल्य आइपिएलले राखेको न्युनतम २ हजार करोडभन्दा २ सय ५० प्रतिशत बढी हो । २२ कम्पनिले फ्रेन्चाइज खरिद गर्न इच्छा देखाएपनि ९ कम्पनि अन्तिम बोलकबोलमा उपस्थित थिए ।
भारतीय क्रिकेट कन्ट्रोल बोर्ड (बिसिसिआइ) अध्यक्ष सौरभ गांगुलीले ठूलो मुल्यमा दुई फ्रेन्चाइज बिक्नु राम्रो संकेत रहेको बताए । अब आइपिएलमा अर्को सिजनबाट १० टोलीले प्रतिस्पर्धा गर्नेछन् । दुवै नयाँ फ्रेन्चाइजले १० वर्षको अवधिमा यो रकम तिर्नुपर्नेछ ।
