Nepal Times
Nepal Times
3
Shares

पहिलो चरणको प्रतिनिधिसभा र प्रदेशसभा सदस्य निर्वाचन सुरू

पहिलो चरणको प्रतिनिधिसभा र प्रदेशसभा सदस्य निर्वाचन सुरू

पहिलो चरणको प्रतिनिधिसभा र प्रदेशसभा सदस्य निर्वाचनअन्तर्गत आज ३२ जिल्लामा निर्वाचन हुँदैछ। बिहान ७ बजेदेखि साँझ ५ बजेसम्म हुने मतदानमा १११ जनप्रतिनिधिका लागि ७०२ उम्मेदवारबीच प्रतिस्पर्धा हुँदैछ।

प्रतिनिधिसभाका ३७ स्थानका लागि २८२ र प्रदेशका ७४ स्थानमा लागि ४२० उम्मेदवार चुनावी मैदानमा छन्। एक करोड ५४ लाख मतदातामध्ये पहिलो चरणमा ३१ लाख ९१ हजार ९४५ मतदाता सहभागी हुँदैछन्।

यसअघिनै प्रमुख निर्वाचन आयुक्त डा. अयोधीप्रसाद यादवले निर्धक्क भएर मतदानमा सहभागी हुन मतदातालाई अपिल गरेका थिए। सम्पूर्ण तयारी पूरा भएको बताउँदै यादवले ढुक्क भएर मतदानमा सहभागी हुन आग्रह गरेका हन्।

पहिलो चरणमा निर्वाचन हुने ३२ जिल्लामा चार हजारभन्दा बढी मतदान केन्द्र तोकिएका छन्।  ३२ जिल्लामा दुई हजार ९१९ मतदान स्थल र चार हजार ४६५ निर्वाचन केन्द्र तोकिएका छन्।

निर्वाचन आयोगका अनुसार आसन्न निर्वाचनमा करिब ५० हजार कर्मचारी चुनावमा खटिएका छन्। चुनावका लागि स्वयंसेवक पनि खटिएका छन्।

निर्वाचन पर्यवेक्षणका लागि पहिलो चरणमा करिब १० हजार पर्यवेक्षक खटिनेछन्।  यो सङ्ख्या स्वदेशी र विदेशी दुवै संस्थाको हो।  युरोपेली सङ्घ, कार्टर सेन्टर लगायतका पर्यवेक्षक चुनावमा खटिनेछन्।  निर्वाचन आयोगले आसन्न निर्वाचनका लागि चार विदेशीसहित ५६ संस्थालाई पर्यवेक्षणको अनुमति दिएको छ।

परिचयपत्र नभए पनि मतदान

निर्वाचन आयोगले प्राविधिक कारणले मतदाता परिचयपत्र नभएको अवस्थामा नागरिकता वा अन्य परिचय खुल्ने कागजातबाट मतदान गर्न पाउने व्यवस्था गरेको छ।  आयोगले २०७० को संविधानसभा सदस्य निर्वाचनमा वितरण गरिएको परिचयपत्र, नागरिकता, राहदानी, सवारीचालक अनुमतिपत्र, जग्गाधनी प्रमाणपत्र तथा सरकारी निकायले प्रमाणित गरेको अन्य कुनै पनि फोटोसहितको परिचयपत्रबाट पनि मतदान गर्न पाउने व्यवस्था गरेको हो।

अपाङ्गता भएका व्यक्ति, गर्भवती महिला, ज्येष्ठ नागरिक, अशक्त बिरामी लगायतलाई मतदानमा प्राथमिकताको व्यवस्था मिलाउन पनि मतदान अधिकृतलाई आयोगले निर्देशन दिएको छ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.