२७ बैशाख, काठमाडौँ ।
देशका कतिपय खोला तथा नदीमा अत्यावश्यक रुपमा रहनुपर्ने झोलुङ्गेपुल नहुदा हजारौ मानिस अझैपनि जोखिमपुर्ण रुपमा नदी तथा खोला तर्न बाधय छन् । कतिपय स्थानमा जोखिमको यात्रा गर्नुपर्ने बाधयता बनेको तुईन अझै विस्थापित हुन सकेको छैन । तर, काठमाडौं शहरको पूर्व तर्फ विना प्रयोजनको दुई डाँडा जोड्ने पुलले दुर्घटनाको जोखिम बढाएको छ ।
यो दृश्य काठमाडौं शहरको पूर्वी कुनाबाट लिइएको हो । तर यो कुनै अग्लो स्थान वा अग्लो घरबाट लिइएको दृश्य भने होइन् । यो झोलुङ्गे पुलबाट लिइएको दृश्य हो । तर, यो झोलुङ्गे पुल न खोला माथि बनेको छ , न यसले कुनै दुई बस्तीलाई जोडेको छ । जोड्छ त केबल डाँडाँ र पाखा । एकातर्फ सार्वजनिक जग्गा र अर्को तर्फ व्यक्तिको नीजि जग्गामा यो पुल बनेको छ ।
काठमाडौं उपत्यकाको पूर्वीक्षेत्रलाई जोड्ने सडक माथि बनेको यो पुलको कुनै प्रयोजन नै देखिँदैन । तर भक्तपुरको सूर्यविनायक नगरपालिकाको वडा नम्बर ९ र चित्तपोल १० जोड्ने यो पुलले व्यवसायी कमल जैनले निर्माण गरेको अग्लो महादेवको मूर्ती रहेको स्थानलाई भने जोडेको छ । सडकमाथि बनेको यो पुलले दुर्घटना जोखिम बढाएको छ ।
संघीय सरकारबाट उपलब्ध १ करोडको बजेटमा निर्माण सम्पन्न भएको यो झोलुङ्गे पुलको उद्घाटन अहिलेसम्म भएको छैन । नजिकै महादेवको मूर्तिमा हेर्न जाने दर्शनार्थीको भीड यो पुलमा समेत पर्न जाने हुँदा अर्को दुर्घटनाको समेत जोखिम छ । पुल रहेको क्षेत्रको भू—बनोटमा २ सय ३५ मिटर लामो पुलपनि जोखिमको अर्को सम्भावना पनि रहेको छ ।
