१९ जेठ, बाँके ।
बाँकेको राप्ती सोनारी गाउँपालिकामा बस दुर्घटना हुदा १२ जनाको मृत्यु भएको छ । दुर्घटनामा अन्य २१ जनाको घाईते भएका छन् ।
आइतबार राति पूर्व-पश्चिम राजमार्गअन्तर्गत राप्ती सोनारी गाउँपालिका-२ स्थित छुरे जंगलमा बिग्रेर रोकिराखेको ना ४ ख ९०६४ नम्बरको ट्रकमा पश्चिमबाट पूर्वतर्फ जाँदै गरेको बा ५ ख ५९९५ नम्बरको फोर्स भ्यान ठोक्किँदा घटनास्थलमै १२ जनाको मृत्यु भएको बाँकेका ट्राफिक प्रहरी प्रमुख पबिन्द्र बमले जानकारी दिए । मृत्यु हुनेहरुमा ११ पुरुष र एक महिला रहेका छन् ।
भ्यानमा ३३ जना सवार रहेको जनाईएको छ । दुर्घटनाका घाइतेहरुलाई उपचारका लागि नेपालगन्जस्थित भेरी अस्पतालमा ल्याइएको छ । साथै मृतकहरुको शव पनि पोस्टमार्टमका लागि अस्पताल लगिएको ट्राफिक प्रहरी प्रमुख बमले जानकारी दिए ।
दुर्घटना राती १२ बजे भएकाे जनाइएकाे छ । मृतककाे सनाखत भइनसकेकाे प्रहरीले जनाएकाे छ । दुर्घटनाको विस्तृत विवरण आउन बाँकी छ ।
