१६ भदौ, एजेन्सी । स्पेनिस ला लिगाको नयाँ सिजन अन्तर्गत रियल म्याड्रिड र बार्सिलोनाबीच हुने विश्वप्रसिद्ध ‘एल क्लासिको’ भिडन्त अक्टोबरमा हुने भएको छ ।
नयाँ सिजनको ला लिगा १३ सेप्टेम्वर २०२० बाट शुरु भएर २३ मे २०२१ मा सम्पन्न हुनेछ । बार्सिलोनाले घरेलु मैदानमा इल्चेसँग तथा रियल म्याड्रिडले घरेलु मैदानमा गेटाफेसँग खेल्दै सिजनको सुरुवात गर्नेछ ।
स्पेनिस फुटबल फेडेरेसन (आरएफइएफ) ले जारी गरेको नयाँ सिजनको खेल तालिका अनुसार सिजनको पहिलो ‘एल क्लासिको’ अर्थात बार्सिलोना र रियल म्याड्रिडबीचको भिडन्त सातौ राउन्डमै अक्टोबरमा हुने भएको हो । खेल बार्सिलोनाको घरेलु मैदान नोउक्याम्पमा २५ अक्टोबरमा हुनेछ ।
दोस्रो एल क्लासिको रियल म्याड्रिडको घरेलु मैदानमा ११ अप्रिल २०२१ मा हुनेछ । जुन ला लिगाको ३०औं राउन्डको खेल हो । बार्सिलोनाले अवे मैदानमा एइवरसँग तथा रियल म्याड्रिडले घरेलु मैदानमै भिल्लारियलसँग खेल्दै सिजनको अन्त्य गर्नेछ ।
अघिल्लो सिजनको क्लासिकोमा एक खेल रियल म्याड्रिडले २–० ले आफ्नो पक्षमा पार्दा एक खेल गोलरहित बराबरीमा सकिएको थियो ।
यस्तै म्याड्रिड डर्वी (रियल र एट्लेटिको) बीचको पहिलो खेल रियलको घरेलु मैदानमा १३ डिसेम्वर २०२० मा तथा दोस्रो खेल एट्लेटिकोको मैदानमा ७ मार्च २०२१ मा हुनेछ ।
अगस्टमा युरोपियन प्रतियोगितामा संलग्न ५ टोली र शीर्ष डिभिजनमा बढुवाको लागि प्ले अफ खेलेको टोलीले सिजनको पहिलो राउन्डमा सहभागी हुनेछैन । जसमा युरोपियन प्रतियोगितामा सहभागी एट्लेटिको मड्रिड, सेभिल्ला, रियल म्याड्रिड, बार्सिलोना र शीर्ष डिभिजनमा बढुवाको लागि प्ले अफ खेलेका इल्चे रहेका छन् ।
एट्लेटिको, बार्सिलोना, सेभिल्ला र इल्चेको दोस्रो राउन्डको खेल पनि स्थगित हुनेछ । उनीहरुले रियल म्याड्रिड र गेटाफेभन्दा पछि सिजनको अन्तिम खेल खेलेका थिए ।
ग्रानडाले ला लिगाको चौथो राउन्डको खेल हुने समयमा युरोपा लिगको प्ले अफ खेल्नुपर्ने भएकाले सेप्टेम्वर ३० मा ओसासुनासँग हुने भनिएको खेल १२ जनवरीमा हुने ला लिगाले जनाएको छ । यस्तै ला लिगाले कुनै पनि समस्या नआए २३ मार्चमा सिजन सकिने बताएको छ ।
