२९ बैशाख, भक्तपुर । मध्यपुरथिमिमा रहेको मध्यपुर अस्पतालले अक्सिजन सकिएको जनाउँदै अब कोरोनाका बिरामीको उपचार नगर्ने जनाएको छ ।
अस्पतालका निर्देशक डा रवीना प्रधानाङ्गले हिजो विज्ञप्ति सार्वजनिक गर्दै मध्यपुर अस्पतालले अब कोरोनाका नयाँ बिरामी भर्ना नलिने जनाए ।
अस्पतालमा अक्सिजन सकिएको तर बिरामी आउने क्रम भने जारी रहेका अवस्थामा बिरामीको ज्यान जोखिममा पर्ने भएकाले सहज आपूर्ति नभएसम्म कोरोना र अक्सिजन चाहिने अरु बिरामी अस्पतालले भर्ना नगर्ने जानकारी दिइएको हो ।
अहिले अस्पतालमा उपचार गराइरहेका बिरामीलाई पनि अक्सिजन नहुँदा कठिनाइ आएको अस्पतालका अध्यक्ष विष्णुराज कार्कीले बताए ।
