१७ असार, काठमाडौं । कोरोना भाइरसबाट सङ्क्रमित हुने दर रोक्नको लागि अस्ट्रेलियाले मेलबर्नमा फेरि लकडाउन लागू गर्ने घोषणा गरेको छ ।
अन्तर्राष्ट्रिय समाचार एजेन्सी रोयटर्सका अनुसार आज बुधबार रातिदेखि यो लकडाउन लागू हुनेछ ।
अस्ट्रेलियाको अन्य ठूला शहर र देशको अन्य बाँकी हिस्सामा नाटकीय ढङ्गले अधिकांश प्रतिबन्ध हटाइएको समयमा मेलबर्नमा भने लकडाउन लागू गर्ने घोषणा गरिएको हो ।
स्थानीय सञ्चारमाध्यमको प्रतिवेदन अनुसार मेलबर्नमा रहने झण्डै तीन लाख २० हजार नागरिकलाई अति आवश्यक पर्दामात्र घरबाहिर निस्कन भनिएको छ ।
आउँदो चार हप्ताको लागि यो लकडाउन लागू हुने बीबीसीले उल्लेख गरेको छ । यस अवधिमा विद्यालय र कार्यालय आउजाउ गर्न, दैनिक उपभोग्य वस्तु खरिद गर्न र स्वास्थ्यकर्मीहरुलाई आवत जावत गर्न प्रतिबन्ध हुने छैन । यद्यपि सबैलाई सामाजिक दुरीको पालना गर्न आग्रह गरिएको छ ।
मेलबर्न जाने सबै उडान रद्द गरिएको छ । साथै शहरका अनावश्यक घुमेर हिँड्नेलाई जरिबाना तिराउने प्रबन्ध पनि गरिएको सञ्चारमाध्यमले जनाएका छन् ।
सरकारी तथ्याङ्कका अनुसार अस्ट्रेलियामा अहिलेसम्म सात हजार नौ सय जनामा कोरोना सङ्क्रमण पुष्टि हुँदा १९ जनाको ज्यान गएको छ ।
