२८ कात्तिक, काठमाडौं ।
दुई अध्यक्षबीच निकै रस्साकस्सीपछि सत्तारुढ दल नेपाल कम्युनिस्ट पार्टी (नेकपा) को सचिवालय बैठक शुक्रबार (आज) बस्दै छ। प्रधानमन्त्रीको सरकारी निवास बालुवाटारमा बैठक बोलाउन अध्यक्षद्वय सहमत भएपछि महासचिव विष्णु पौडेलले बैठक आह्वान गरेका हुन्।
बैठक बस्ने भएपछि प्रधानमन्त्रीसमेत रहेका पार्टी अध्यक्ष केपी ओली र कार्यकारी अध्यक्ष पुष्पकमल दाहाल आआफ्ना रणनीति बनाउन सक्रिय भएका छन्। शुक्रबार ४ बजेका लागि तय भएको बैठकमा आआफ्ना अजेन्डा पेस गर्ने तयारी दुवै अध्यक्षको छ। उनीहरू बैठकमा कसरी प्रस्तुत हुने भन्ने रणनीति बनाउन आआफ्ना समूहमा छलफलमा जुटेका छन्।
प्रधानमन्त्री केपी शर्माा ओलीले बालुवाटारमा उपप्रधानमन्त्री ईश्वर पोखरेल, महासचिव पौडेललगायत नेतासँग छलफल गरे। प्रधानमन्त्री ओलीले स्थायी समिति सदस्यहरू शंकर पोखरेल, सुवास नेम्बाङलगायत आफूनिकट नेताहरूसँग पनि परामर्श गरेको जनाइएको छ।
अर्का अध्यक्ष पुष्पकमल दाहाल खुमलटारमा सचिवालयका बहुमत नेतासँग छलफलमा जुटे। अध्यक्ष दाहालले वरिष्ठ नेता माधवकुमार नेपाल, झलनाथ खनाल, प्रवक्ता नारायणकाजी श्रेष्ठसँग सामूहिक रूपमा र उपाध्यक्ष वामदेव गौतमसँग अलग्गै भेट गरेका हुन्।
दुवै पक्षले फेरि उपाध्यक्ष गौतमलाई फकाउने प्रयास जारी राखेका छन्। हाल दाहाल–नेपाल खेमामा खुलेका गौतम बैठकसम्म टिममै रहन्छन् कि प्रधानमन्त्रीलाई साथ दिन पुग्छन् भन्नेमा कसैले केही टिप्पणी गरेका छैनन्।
गौतमले विगतमा पनि अन्तिम समयमा ओलीलाई साथ दिएका थिए। त्यसकारण यसपटक बैठकमा उनले व्यक्त गर्ने धारणा नेकपाका नेता÷कार्यकर्ताका लागि चासो बनेको छ।
गौतमनिकट नेताका अनुसार भने यसपटक गौतमले पार्टी विधि र पद्धतिमा केन्द्रित रहेर धारणा राख्नेछन्। उनले बिहीबार दाहालसँगको भेटमा पनि आफू यसपटक दायाँबायाँ नगर्ने प्रतिबद्धता जनाएको स्रोतले बताएको छ। तर, महासचिव पौडेलले पनि बिहीबार बिहान गौतमसँग भेट गरेकाले उनको भूमिका के होला भनेर नेकपाभित्र अझै सन्देह छ।
दाहाल–नेपाल पक्ष स्थायी समिति बैठक बोलाउन दबाब बढाउने गरी अगाडि जान खोजेको स्रोतले बताएको छ। ओली पक्षले भने सकभर विषयलाई समझदारीका साथ सचिवालयमै नै टुंग्याउने रणनीति बनाएको छ।
दाहाल भदौ २६ गतेको निर्णय कार्यान्वयन नभएको, कर्णाली प्रदेशमा देखिएको पार्टीको आन्तरिक समस्या, पर्सामा पार्टीकै कार्यकर्ताको हत्या, भारतीय गुप्तचर संस्था ‘रअ’ का प्रमुख सामन्तकुमार गोयलसँगको भेटघाट, राजदूत नियुक्ति प्रकरण, पछिल्लो पटक मन्त्रिपरिषद् विस्तारको प्रसंग तथा कोरोना संक्रमणमा सरकारले गरेका कामकारबाहीबारे छलफल गरेर प्रधानमन्त्री ओलीलाई अप्ठ्यारोमा पार्ने रणनीतिमा लागेका छन्।
पछिल्लो पटकको मन्त्रिपरिषद् विस्तार, राजदूत नियुक्ति र कर्णाली प्रदेशको विवादबाट दुई अध्यक्षका बीच आएको विवाद समाधान नहुँदा सचिवालय बैठक बस्न समेत अप्ठ्यरो परेको थियो।
