२५ जेठ, रौतहट ।
रौतहटको राजपुरस्थित फरदहवामा इँटाभट्टामा जिउँदै मानिस जलाएको घटनाका पूर्वमन्त्री मोहम्मद आफताब आलमका सहयोगी पक्राउ परेका छन् । पक्राउ पर्नेमा बारा सिम्रौनगढ नगरपालिका- का ५५ वर्षीय मुक्ति साह छन् ।
शनिबार राति भारतबाट पक्राउ गरी ल्याइएका उनलाई प्रदेश प्रहरीले आइतबार जिल्ला अदालत गौरमा पेस गरेको प्रदेश २ प्रहरी कार्यालय जनकपुरका डीआईजी धिरजप्रताप सिंहले बताए । उनी घटनाको १३ वर्षपछि पक्राउ परेका हुन् ।
पूर्वमन्त्री शेख इद्रिसको गोठमा बम विस्फोट गराई मानिसलाई इँटाभट्टामा जलाइएको मुद्दामा पूर्वमन्त्री एवं कांग्रेस नेता आलम गत कात्तिक २९ गतेदेखि नख्खु जेलमा छन् ।त्यतिबेला इँटाभट्टामा मिस्त्रीको काम गर्ने साहलाई प्रदेश प्रहरी कार्यालय जनकपुरको टोलीले भारतको सीमावर्ती इलाका सिम्रौनगढ नगरपालिका ८ बाट राति पक्राउ गरेर ल्याएको हो ।
आरोप लागेका अन्य ९ जना फरार छन् । सो घटनामा पूर्वमन्त्रीलगायत उनका भाइ महताब आलम, मोहम्मद मोबिन आलम, शेख भदई, शेष सराज, शेख फजलेहक, सगिर आलम, शेख मलकार, गौरीशंकर साह र बद्रि सहनी अझै फरार छन् । घटना भएको यकिन गरिए पनि घाइते र मृतकको संख्या भने ठ्याक्कै खुल्न सकेको छैन ।
पहिलो संविधानसभा निर्वाचनको अघिल्लो दिन २०६४ चैत २७ गते राति राजपुर नगरपालिका(४ (साबिक राजपुर गाविस(४) स्थित आलमका काका शेख इद्रिसको गोठमा बम विस्फोट भएको थियो । सो घटनामा यमुनामाई गाउँपालिका(४ (साबिक सरुअठा(४ ) का त्रिलोकप्रसाद सिंह (पिन्टु) र ओसी अख्तर घाइते भएका थिए । उनीहरुलाई इँटाभट्टामा घाइते अवस्थामा जिउँदै जलाइएको आलमलगायत ११ जनामाथि आरोप छ । राजनीतिक आवरणमा लुकाइएको यो घटनाको १२ वर्षपछि तत्कालीन जिल्ला प्रहरी प्रमुख एसपी भुपेन्द्र खत्रीले गत असोज ११ गते आलमलाई पक्राउ गरेका थिए ।
