नेपाल टाईम्स 
२७ भदौ, दोहा ।
ओमानमा कोभिड–१९ को महामारीको कारण सिर्जित विषम परिस्थितिले गर्दा नेपाल फर्कन दूतावासमा नाम टिपाएका मध्येबाट आज पाँचौ उडान मार्फत ३९ महिला र १२६ पुरूष सहित १६५ नेपाली स्वदेश फर्किएका छन् । योसंगै ओमानबाट फर्किनेको सङ्ख्या ८३० पुगेको छ ।
साथै, मानव तस्करको फन्दामा परी पर्यटक भिसामा गैरकानूनी बाटो हुँदै वैदेशिक रोजगारीको लागि ओमान पुगेर घरेलु कामदारको रूपमा काम गर्ने क्रममा अलपत्र परेकी ताप्लेजुङकी अरुणा मादेन र स्याङ्जाकी गज कुमारी श्रेष्ठलाई समेत कूटनीतिक पहलमा आवश्यक प्रक्रिया पुरा गरी आजकै उद्धार उडान मार्फत नेपाल फर्काईएको ओमानका लागि नेपाली राजदूत सर्मिला पराजुली ढकालले जानकारी दिइन् ।
त्यसैगरी यस उडानमा विभिन्न कम्पनीमा कार्यरत एवम् घरेलु कामदारको रूपमा कार्यरत करिब ६० जना नेपालीहरूलाई आवश्यक समन्वय तथा पहल गरी घर फिर्ता पठाइएको दूतावासले जनाएको छ । आजकै उडानबाट नेपाल जानेमध्ये झापाको बाह्रदशी गापा–६ की नेत्र कुमारी राउतलाई स्वदेश पठाइएको छ ।
राउत वैदेशिक रोजगारीको सिलसिलामा घरेलु कामदारको रूपमा केही वर्ष अघि ओमान आएकी र २०७० साल देखी सम्पर्क विहीन भएको भन्दै उनको छोरा नवराज राउतले आफ्नी आमालाई नेपाल फर्काउन परराष्ट्र मन्त्रालयमार्फत निवेदन दिए अनुसार तथ्य प्रमाण एवं कूटनीतिक माध्यमबाट उनलाई सम्पर्कमा ल्याईएको र स्वास्थ्य अवस्था पनि नाजुक रहेको हुँदा घरसम्मै लैजाने व्यवस्थाका लागि दूतावासले सहजीकरण गरेको जनाएको छ ।
बिदाईका लागि विमानस्थल पुगेकी राजदूत सर्मिला पराजुली ढकालले सम्पूर्ण नेपालीहरुलाई स्वदेश फिर्तीको लागि सफल यात्रा तथा सुखमय जीवनको लागि शुभकामना व्यक्त गरेकी थिइन् ।
यात्रामा सहभागी सम्पूर्ण नेपालीहरुले दूतावासको सक्रियतामा चार्टर उडानमार्फत् सुलभ दरमा स्वदेश फर्कने अवसर प्राप्त भएकोमा राजदूत तथा समस्त दूतावासको कार्यको प्रशंसा गर्दै धन्यवाद दिएका थिए ।
