१४ कात्तिक, काठमाडौं ।
नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’सँग परराष्ट्रमन्त्री तथा स्थायी कमिटी सदस्य प्रदीपकुमार ज्ञवालीले शुक्रबार विहान भेटघाट गरेृका छन् । नेकपाका दुई अध्यक्षबीचको संवाद हुन नसकिरहेका बेला अध्यक्ष तथा प्रधानमन्त्री केपी ओलीको सन्देश लिएर गएका मन्त्री ज्ञवालीले अध्यक्ष प्रचण्डसँग छलफल गरेका हुन् ।
अध्यक्षसँग नेता ज्ञवालीको समसामयिक विषयमा छलफल भएको र उनको स्वास्थ्य अवस्थाका बारेमा जानकारी लिएको प्रेस सल्लाहकार सापकोटाले बताए।अध्यक्ष प्रचण्डलाई भेट्न विहान साढे ८ बजेतिर परराष्ट्रमन्त्री ज्ञवाली खुमलटार पुगेका थिए। उनले प्रचण्डसँग डेढ घण्टा छलफल गरेको प्रचण्डको सचिवालयले जनाएको छ।
अध्यक्ष प्रचण्ड केही दिनदेखि घरमै कन्ट्रयाक्ट ट्रेसिङमा हुनुहुन्छ । नेता जनार्दन शर्मासहितका केही नेताको पिसिआर रिपोर्ट पोजेटिभ देखिएपछि उनीहरुसँग नियमित छलफलमा रहेका अध्यक्ष प्रचण्ड केही समयका लागि घरमै बसेका उनको प्रेस सल्लाहकार विष्णु सापकोटा जुगलले जानकारी दिए ।
नेकपाका दुई अध्यक्षबीच केही समय यता संवाद हुन नसकिरहेका बेला सञ्चार माध्ययममा विभिन्न एङ्गलबाट समाचार आए पनि कन्ट्रयाक्ट ट्रेसिङमा परेपछि दुई अध्यक्षबीच छलफल हुन नसकेको प्रेस सल्लाहकार सापकोटाले बताए। अध्यक्ष प्रचण्डसँग विहिबार लुम्बिनी प्रदेशका मुख्यमन्त्री शंकर पोखरेलले छलफल गरेकाे सापकोटाले जानकारी दिए
