३० असोज, काठमाडौँ । लोकसेवा आयोगले आगामी मंसिर र पुसमा लिने भनिएको परीक्षा प्रभावित हुन सक्ने देखिएको छ । कर्मचारीहरूलाई कोरोना संक्रमण देखिएपछि आयोगका तीन महत्वपूर्ण शाखा बन्द गराइएका छन् ।
ती शाखाका कर्मचारी दसैंअघि काममा फर्किन सक्ने सम्भावना नरहेकाले परीक्षा प्रभावित हुन सक्ने आयोगस्रोतले जनायो ।
विज्ञापन प्रकाशन, प्राविधिक र अप्राविधिकतर्फको लिखित नतिजा प्रकाशन शाखाहरू बन्द गरिएको छ । अब हुने भनिएका परीक्षा प्रभावित भए हालै आयोगले निकालेको विज्ञापन पनि प्रभावित भई परीक्षा तालिका पछाडि धकेलिनेछ ।
सहकर्मीलाई संक्रमण देखिएपछि शुक्रबारसम्म केन्द्रिय कार्यालयका करिब २० जनाभन्दा बढी कर्मचारी क्वारेन्टाइनमा बसेका छन् । सामान्य प्रशासन मन्त्रालयबाट रिक्त दरबन्दीबारे पत्राचारमा खटिने कर्मचारीलाई सुरुमा संक्रमण देखिएको थियो । अहिले चार जनामा संक्रमण देखिएको आयोगस्रोतले बतायो । आयोगले केही दिनमै उपसचिवको नतिजा निकाल्ने तयारी गरेकोमा त्यो पनि पछाडि सर्ने भएको छ ।
लोकसेवा आयोगले गत चैतमा लकडाउनपछि रोकिएका परीक्षा फेरि सुरु गर्ने तयारी गरेको थियो । लोकसेवाले गत १९ र २२ गते सूचना निकालेर प्राविधिक अधिकृतको परीक्षा तालिका सार्वजनिक गरेको थियो ।
त्यसै गरी आयोगले नासु र खरिदारको परीक्षा तालिका पनि प्रकाशित गरेको थियो ।
त्यही परीक्षालाई दृष्टिगत गरी लोकसेवाले संक्रमितहरू परीक्षामा सहभागी हुन नपाउने भनी मापदण्ड सार्वजनिक गरेको थियो । मापदण्डका कारण संक्रमितप्रति विभेद हुने भनी दर्ता भएको निवेदनमाथि सुनुवाइपछि सर्वोच्च अदालतले विभेदकारी प्रावधान कार्यान्वयन नगर्न आदेश दियो । त्यो आदेशपछि समेत परीक्षा तालिका प्रभावित हुने स्रोतले बतायो । आगामी सोमबार बस्ने आयोगको नियमित छलफलमा यसबारे निर्णय हुनेछ । ईकान्तिपुरबाट साभार ।
