विराटनगर,जेठ २१
१ नम्बर प्रदेशसभामा अवरुद्ध हुने संस्कृतिको सुरुवात भएको छ ।
सरकारका काम कारबाहीमा चित्त नबुझे संसद अवरुद्ध गर्ने वा सभामुखको रोष्टममा गएर उभिने, नाराबाजी गर्ने प्रतिपक्षको चलन छ ।
सोही परम्परा आइतबार १ नम्बर प्रदेशसभा संसदमा पनि सुरु भएको छ । प्रदेशसभाको मुख्य प्रतिपक्षी दल नेपाली कांग्रेसले आफ्ना नेता तथा सुनसरी जिल्लाका तरुण दलका सभापति सिजन गुरुङलाई बिना कारण थुनामा राखेको भन्दै संसद अवरुद्ध गरेको हो ।
राष्ट्रिय गान पछि सभामुखले आफ्नो कारबाही अगाडि बढाउन खोज्दा नेपाली कांग्रेसका सांसद सभामुखको रोष्टम अगाडि उभिएपछि संसद अवरुद्ध बनेको थियो । सभामुखले पटक पटक बस्न आग्रह गर्दा पनि सांसदहरु नबसेपछि कांग्रेसका सचेतक केदार कार्कीलाई आफ्नो कुरा राख्न सभामुखले आग्रह गरेका थिए ।
सभामुखको आग्रह पछि संसदमा बोल्दै कार्कीले आफ्ना कार्यकर्ता पक्राउको विषयमा जानकारी नदिएका कारण संसद अवरुद्ध गर्नुपरेको बताए । त्यसपछि १० मिनेटका लागि स्थगित भएको संसद पुनः सुचारु भएको छ । आन्तरिक मामिला तथा कानून मन्त्री विराटनगर बाहिर भएको कारण सोमबार बस्ने बैठकमा जवाफ दिने सत्तारुढ दलसँग सहमति भएपछि बैठक सुचारु भएको हो ।
आइतबारको बैठकमा पनि सांसदहरूले विनियोजन विधेयकमा समावेश हुने बजेट तथा कार्यक्रमको सिद्धान्त, उद्देश्य र प्राथमिकता र प्रमुख नीति सहितको पूर्व बजेट सम्बन्धमा छलफल गरेका छन् ।
छलफलमा बोल्दै सांसदहरु नारायणबहादुर मगर, सीता थेबे, कुलप्रसाद साम्बा, एशोदा अधिकारी, कुशुम श्रेष्ठलगायतले आउने बजेटको प्राथमिकताका विषयमा बोलेका थिए ।
