९ भदौ, काठमाडौं ।
नेपाली कांग्रेस नेता गोविन्द रञ्जितको कोरोना भाइरस (कोभिड–१९) संक्रमणबाट मृत्यु भएको छ। काठमाडौं महानगरपालिका–२१ का सभापति रञ्जितको बलम्बुस्थित सशस्त्र प्रहरी अस्पतालमा उपचारका क्रममा मंगलबार दिउँसो १२ बजेर १७ मिनेट जाँदा मृत्यु भएको अस्पताल स्रोतले जानकारी दिएको छ।
कोरोना संक्रमणमा पुष्टि भएपछि साउन ३२ गते उनी अस्पतालको आइसीयूमा भर्ना भएका थिए। उनको स्वास्थ्यमा समस्या भएपछि भेन्टिलेटरमा राखेर उपचार थालिएको थियो ।
उनको निधनप्रति नेपाली कांग्रेसका सभापति शेरबहादुर देउवाले गहिरो दुःख व्यक्त गरेका छन् । पार्टी मुख्य सचिव कृष्णप्रसाद पौडेलले सभापतिको तर्फबाट विज्ञप्ति सार्वजनिक गर्दै उनको निधनप्रति दुःख व्यक्त गरेका हुन् ।
२०३६ सालदेखि विद्यार्थी आन्दोलनबाट राजनीतिक जीवन यात्रा प्रारम्भ गरेका रञ्जितले पार्टी संगठन र नेपालको लोकतान्त्रिक आन्दोलनहरुमा सक्रिय भूमिका निर्वाह गरेको नेपाली कांग्रेसले जनाएको छ ।
