खतिवडा, रेग्मी र विश्वकर्माको नाम राजदूतका लागि अनुमोदित

0SHARES

२७ कार्तिक २०७७ नेपाल टाईम्स

२७ कात्तिक, काठमाडाैँ ।

संसदीय सुनुवाइ समितिले अमेरिका, बेलायत र दक्षिण अफ्रिकाका लागि सरकारले प्रस्ताव गरेको तीनै जना राजदूतको नाम अनुमोदन गरेको छ।

गत असोज १६ गते मन्त्रिपरिषदको बैठकले  पूर्वअर्थमन्त्री डा. युवराज खतिवडालाई अमेरिका, पूर्वमुख्यसचिव लोकदर्शन रेग्मीलाई बेलायत र डा. निर्मलकुमार विश्वकर्मालाई दक्षिण अफ्रिकाका लागि नेपाली राजदूत नियुक्त गर्न सिफारिस गरेको थियो । बिहीबार लामो छलफलपछि समितिले तीनै जनाको नाम अनुमोदन गरिएकाे हो ।

समिति सभापति लक्ष्मणलाल कर्णले तीनै जनाको नाम सर्वसम्मतले अनुमोदन भएको जानकारी दिए। राजदूतहरुको नियुक्ति सरकारको सिफारिस र संसदीय सुनुवाइ समितिको अनुमोदनपछि राष्ट्रपतिबाट हुने संवैधानिक व्यवस्था छ ।

समितिमा खतिवडाविरुद्ध ३ वटा र रेग्मीविरुद्ध एउटा उजुरी परेको थियो। तर उजुरीकर्ताहरू समितिको सम्पर्कमा आएनन्। उजुरीकर्ता नआएपछि समितिले सुनुवाइ अगाडि बढाएको थियो।

प्रस्तावित राजदूतहरूले आफ्नो योग्यता र क्षमता समितिमा प्रस्तुत गरका थिए। सुनुवाइका क्रममा पूर्वअर्थमन्त्री खतिवडाले एमसिसी परिमार्जनका लागि सहजीकरण गर्ने बताएका छन्।

राजदूतमा सिफारिस हुनु ठिकअघि उनी प्रधानमन्त्रीका आर्थिक सल्लाहकार थिए। अमेरिकाको राजदूतको पोर्टफोलियो मन्त्री सरहको हुनेछ।

विज्ञापन बक्स