१६ कात्तिक, काठमाडौं । गएको हप्ता विदेशमा कार्यरत थप ९६३ जना नेपालीमा कोरोना सङ्क्रमण पुष्टि भएको छ ।
गैरआवासीय नेपाली सङ्घ एनआरएनएको स्वास्थ्य समितिका अनुसार शनिबार साँझसम्म विदेशमा रहेका थप ९६३ नेपालीलाई कोरोना सङ्क्रमण देखिएको हो । सङ्क्रमति मध्ये ४५० जना रोमानियामा कार्यरत नेपाली रहेका छन् ।
गैरआवासीय नेपाली सङ्घको स्वास्थ्य समितिका संयोजक डा. सञ्जीव सापकोटाका अनुसार गएको हप्ता रोमानिया, पोल्याण्ड, स्पेन, कतार, भारत, क्यानाडा र बेलायतमा रहेका नेपालीमा कोरोना सङ्क्रमण देखिएको हो । थप नेपालीमा सङ्क्रमण पुष्टि भए पनि गएको हप्ता कोही पनि नेपालीको विदेशमा कोरोनाको कारण ज्यान गएको छैन ।
अहिलेसम्म विदेशमा ४२ देशमा रहेका ४३ हजार ५६९ नेपालीमा कोरोना सङ्क्रमण पुष्टि भएको हो । सङ्क्रमित नेपाली मध्ये ३९ हजार ५६५ जना अर्थात ९२ प्रतिशत निको भएको स्वास्थ्य समितिले जनाएको छ ।
अहिलेसम्म १९ देशका २८४ नेपालीको कोरोना सङ्क्रमणबाट ज्यान गएको छ ।
