नेपाल टाईम्स 
१ फाल्गुन, काठमाडौं । नेपाल कम्युनिष्ट पार्टी (नेकपा)का कार्यकारी अध्यक्ष पुष्पकमल दाहालले सही विचार र सही नेतृत्व भएकै कारण असम्भव भनिएका कुराहरु सम्भव हुँदै गएको बताएका छन् ।
नेपाल कम्युनिष्ट पार्टी (नेकपा)ले आयोजना गरेको जनआन्दोलन तथा जनयुद्धका शहीदहरुको स्मृतिमा आयोजित कार्यक्रमलाई सम्बोधन गर्दै अध्यक्ष दाहालले सही नेतृत्व भएकै कारण कटुतापूर्ण र सत्रुतापूर्ण संघर्षमा रहेका दुई मुख्य पार्टीहरुको एकता सम्भव भएको बताए ।
उनले तत्कालिन माओवादीले सुरु गरेको जनयुद्धकै कारण देशमा संघीय लोकतान्त्रीक गणतन्त्र स्थापित हुन सकेको उल्लेख गर्दै भने ‘सही बिचार र सही नेतृत्वले ईतिहासमा ठुलोठुलो फड्कोहरु मार्न योगदान गर्न सक्छ सही विचार र सही नेतृत्वले असम्भव जस्ता ठानिएका परिवर्तनलाई पनि सम्भव तुल्याउन सक्छ किनभने केही वर्ष पहिले सम्म नेपालमा यति छिट्टै संविधान सभा भइहाल्ला संघीय लोकतान्त्रीक गणतन्त्र घोषणा गरीहाल्ला आपसमा निकै तितो र कटुतापूर्ण र कहीले काहिं सत्रुता पूर्ण संघर्षमा रहेका २ वटा मुख्य पार्टीहरु एकतामा आइपुग्लान र अनि चुनावमा दुई तिहाई बहुमत ल्याउने गरी प्रस्तुत होलान भन्ने केही वर्ष अगाडी सम्म मानिसले सोच्दैन थिए तर म भन्न चाहन्छु, विनम्रतापूर्वक भन्न चाहन्छु सही विचार र सही नेतृत्व छ भने ती असम्भव भनेका कुरालाई सम्भव बनाउन सकिन्छ, जनयुद्ध आफै सुरुका दिनहरुमा हेर्दा धेरैलाई विश्वास थिएन ।’
अध्यक्ष दाहालले तत्कालिन समयमा माओवादी र एमालेबीच संविधान सभामा जाने भन्ने सहमति भएको र त्यसकै जगमा कांग्रेससँग पनि मिल्न पुगेको र सात राजनीतिक दलहरुसँग माओवादीले १२ बुँदे सम्झौता गर्न पुगेको बताए ।
उनले देशमा एकातिर जनयुद्ध र अर्कोतिर शान्तिपूर्ण जनआन्दोलन एकसाथ सञ्चालन गर्न तत्कालिन ७ राजनीतिक दल र नेकपा माओवादीबीचमा भएको समझदारीबाट नै सम्भव भएको बताए । उनले असाधारण र फरक किसिमबाट बनेको समझदारीबाट नै देशमा राजतन्त्रको समाप्ती र संघीय लोकतान्त्रीक गणतन्त्र स्थापना गर्न सफल भएको समेत बताए ।
अध्यक्ष दाहालले नेपाली कांग्रेसका तत्कालिन नेता दिवंगत गिरिजाप्रसाद कोइराला र आफुबिच राजधानीमा जनआन्दोलन बढ्दै थएका बेला दिनदिनै फोनमा कुरा भएको र त्यसबेला कोइरालाले अझ बढी फौजि आक्रमण बढाइदिन आग्रह गरेको खुलासा समेत गरे ।
दुईवटा हाम्रो कम्युनिष्ट पार्टीको पहिला सहमति भएर हस्ताक्षर भइनै सकेको थियो हामी मिलेर अव संविधान सभातिर जाने भन्ने विषयमा नेपाली कांग्रेससँग पनि राखेर त्यही प्रकृयाबाट १२ बुँदे समझदारी भयो र नेपाली कांग्रेसको तत्कालिन नेता दिवंगत गिरिजाप्रसाद कोइराला र मेरो बीचमा झण्डै लगातार जस्तो दिनदिनै जस्तो फोनमा कुरा हुन्थ्यो र उनले अझै आक्रमण बढाउनु प¥यो भन्नु हुन्थ्यो मलाई फौजि आक्रमण अझ बढाईदिनु प¥यो भन्नुहुन्थ्यो अलि सदरमुकाम हान्न प¥यो अलि ठुलोठुलो आक्रमण गर्न प¥यो भन्नु हुन्थ्यो यो पनि विचित्र हो । यस्तो संसारमा कमै हुन्छ यही विचित्रको परिस्थीतिले नै नेपालमा ढाइसय वर्ष पुरानो शाह वंशिय राजतन्त्रको अवसान गर्ने वातावरण बन्यो र देश संघीय लोकतान्त्रीक गणतन्त्रमा आइपुग्यो । यही विचार प्रवृति हावी भएकै हुनाले एकता सम्भव भयो ।’
अध्यक्ष दाहालले तत्कालिन समयमा नेतृत्वले सही निर्णय नगरेको भए देशमा ठुलो समस्या उत्पन्न हुनसक्ने खतरा रहेको बताए । उनले विश्वमा अन्य मुलुकमा शान्ति प्रक्रिया पुरा हुन नसकेको र विद्रोहका प्रमुख नेता नै मारिएको उल्लेख गर्दै नेपालमा आफूहरु शौभाग्यशाली भएर नै सशस्त्र विद्रोहलाई शान्तिपूर्ण वातावरणमा ल्याउन सफल भएको बताए ।
अध्यक्ष दाहालले जनयुद्ध र जनआन्दोलनको बलमा शान्ति प्रक्रिया सम्भव भएको र मुलुक समाजवादको आधार निर्माण तर्फ अघि बढेकोले अव जनयुद्धको नक्कल गरेर विद्रोह सम्भव नहुने समेत बताए ।
कार्यक्रममा नेपाल कम्युनिष्ट पार्टी नेकपाका उपाध्यक्ष बामदेव गौतमले जनयुद्ध जनताको मुक्ति र समृद्धिका लागि भएको बताए । उनले विश्वमा कहिं नभएको सफलता नेपालमा भएको जनयुद्धले प्राप्त गर्न सफल भएको बताए । उनले २००७ साल देखि नै राजनीतिक युद्ध चलिरहेको अवस्थामा जनयुद्धले नेपालको राजनीतिलाई नै परिवर्तन गराईदिएको बताए ।
उनले जनयुद्धका बेला तत्कालीन एमालेले पनि ठुलो क्षति बेहोर्नुपरेको उल्लेख गर्दै गल्ती कमजोरी नगरी कोही अगाडि बढ्न नसक्ने समेत बताए । उनले पछिल्लो समय पार्टी एकता हुँदा देशमा स्थायित्व आएकाले पार्टी भित्र देखिएका अन्तरविरोधहरु छिट्टै हल गर्न नेतृत्व सफल हुने विश्वा व्यक्त गरे ।
कार्यक्रममा शहीदहरुप्रति श्रदान्जलि व्यक्त गरिएको थियो । कार्यक्रममा नेकपा उपाध्यक्ष बामदेव गौतम, महासचिव विष्णु पौडेल, गृहमन्त्री रामबहादुर थापा, परराष्ट्रमन्त्री प्रदीप ज्ञवाली लगायतका नेताहरुको उपस्थिति थियो । कार्यक्रममा प्रधानमन्त्री तथा पार्टी अध्यक्ष केपी शर्मा ओली भने सहभागि हुनुभएन् । उहाँ सहभागि हुने बताइएपनि गएनन् । प्रधानमन्त्री ओली गत वर्ष फागुन एक गते आयोजना गरिएको कार्यक्रममा पनि सहभागी भएका थिएन् ।
