डीपीएल विजेताले ३० लाख पाउने

0SHARES

२४ माघ २०७५ नेपाल टाईम्स

काठमाडौं, माघ २४
यही माघ २६ देखि फागुन ११ गतेसम्म धनगढीमा हुने तेस्रो संस्करणको धनगढी प्रिमियर लिग (डीपीएल) क्रिकेट प्रतियोगिताको विजेताले रू. ३० लाख पाउने भएको छ । आयोजक धनगढी क्रिकेट एकेडेमीका अध्यक्ष सुवास शाहीले विगतका संस्करणझैं यसपटक पुरस्कार सर्वाधिक धनराशिको रहने जानकारी दिए ।

उनले प्रतियोगिताको पुरस्कार राशिमा २० प्रतिशत बढाइएको बताउँदै प्रतियोगिताको कुल पुरस्कार राशि रू. ६० लाख रहेको बताए । त्यसमा विजेताले रू. ३० लाख, उपविजेताले १२ लाख, तेस्रो हुनेले रू. ४ लाख तथा चौथो हुने टोलीले रू. २ लाख पाउनेछन् । आयोजकका अनुसार मैदान तथा प्राविधिक व्यवस्थापनको काम लगभग सकिएको छ । अन्तरराष्ट्रिय क्रिकेट परिषद् (आईसीसी)बाट मान्यता प्राप्त प्रतियोगिता डीपीएल–३ मा धनगढी स्टार्स, रुपेन्देही च्यालेन्जर्स, महेन्द्रनगर यूनाइटेड, सिवाइसी अत्तरिया, काठमाडौं गोल्डेन्स र विराटनगर किंग्सको सहभागिता रहनेछ ।

सबै टोलीमा १२ ‘अक्सन’बाट लिइएका खेलाडी (स्थानीयसहित), एक रणनीतिक खेलाडी र दुईजना विदेशी खेलाडी रहने छन् । प्रतियोगिताको ‘गुडविल एम्बास्डर’मा दक्षिण अफ्रिकाका पूर्व क्रिकेटर जोन्टी रोड्स रहेका छन् । रोड्स बिहीबार धनगढी पुग्ने कार्यक्रम रहेको छ । यस्तै प्रतियोगिताको गोल्डस्टार मोष्ट भेल्युएवल प्लेयरलाई गोल्डस्टार सुनको जुत्ता दिइनेछ । प्रत्येक खेलका नबिल बैंक म्यान अफ द म्याचलाई रू. १५ हजार, म्यान अफ द सिरिज, वेस्ट ब्याट्सम्यान र बेस्ट बलरलाई समेत उचित पुरस्कारको व्यवस्था गरिएको पत्रकार सम्मेलनमा जानकारी दिइएको छ ।

प्रतियोगिता सम्पन्न गर्न रू. ५ करोड खर्च हुने आयोजकको अनुमान छ । पहिलो संस्करणको डीपीएलको बजेट रू. १ करोड ८२ लाख थियो भने कुल पुरस्कार रू. २८ लाख ५० हजार थियो । यस्तै दोस्रो संस्करणमा रू. ३ करोडको लागतमा प्रतियोगिता सम्पन्न भएको थियो, जसमा विजेतालाई रू. २५ लाखसहित कुल रू. ५० लाख पुरस्कार प्रदान गरिएको थियो ।

विज्ञापन बक्स