तुहियो १५ करोड कमाउने सपना, ५ चेपाङ पक्राउ

१ भाद्र २०७६

१ भदौ, हेटौंडा।
आर्थिकरुपमा अतिविपन्न चेपाङहरु बारम्बार ठगिँदै आएका छन् । यही शृंखलामा मकवानपुरका चेपाङ समुदायलाई घर बनाइदिने भन्दै ठगी गर्नेहरु प्रहरीको नियन्त्रणमा परेका छन् । आफ्नै समुदायप्रति अन्याय गर्ने मकवानपुरका पाँच चेपाङलाई प्रहरीले काठमाडौंमा पक्राउ गरेको हो ।

काठमाडौंको माछापोखरी चोकमा चितवनको राप्ती नगरपालिकाका सन्तोष प्रजा र जगमणि प्रजासँग फारम भरेबापत् रकम भनी २ हजारका दरले असुलेर कागज गर्दैगर्दा उनीहरु पक्राउ परेका हुन् ।मकवानपुर र चितवनको चेपाङ बस्तीमा ३ सय वटा घर बनाइदिने भन्दै ठगी गर्ने गिरोह नै काठमाडौंमा पक्राउ परेको हो । घर बनाइदिने भन्दै सर्वसाधारणसँग उनीहरुले प्रतिफारम शुल्कका नाममा २ हजार रुपियाँ असुलेको आरोप छ ।

पक्राउ पनेरुमा राक्सिराङ–५ का ३८ वर्षीय दानियल भनिने श्यामबहादुर प्रजा (चेपाङ), ३४ वर्षीय बिनोद प्रजा (चेपाङ), ३० वर्षीय दीपक प्रजा (चेपाङ), २५ वर्षीय प्रिन्स भनिने राजकुमार प्रजा (चेपाङ) र २४ वर्षीय राज प्रजा (चेपाङ) रहेको प्रहरीले जानकारी दिएको छ । उनीहरुको १५ करोड कमाउने प्रपञ्च प्रहरी सक्रियतामा तुहिएको हो ।

३ सय घर बनाउने भन्दै प्रतिघर फारम शुल्क भन्दै २ हजार उठाइएको प्रहरीले जनाएको छ । घर बनिसकेपछि प्रतिघर ५ लाख रुपियाँ दिनुपर्ने कागजसमेत गरिएको पाइएको छ । आदिवासी जनजाति उत्थान राष्ट्रिय प्रतिष्ठानको ५९ जनजातिमध्ये चेपाङ एक हो । २०६८ को जनगणनाअनुसार चेपाङको जनसंख्या ६८ हजार ३ सय ९९ छ । यिनीहरु मकवानपुर, धादिङ, चितवन, गोरखा, लमजुङ र तनहुँमा छरिएका बसेका पाइन्छन् । चेपाङ बाहुल्य जिल्ला मकवानपुरमा चेपाङहरु १९ हजार २ सय ३३ रहेको तथ्यांक छ ।

भिरालो पाखो बारी, नजिकै जंगल भीरपहरा आसपासमा ससाना झुपडी बस्ती चेपाङका छन् । थोरै अन्न अनि बनजंगलबाट कन्दमूल, वनस्पति, फलफुल लिएर जीविकोपार्जन गर्छन् । गिठ्ठा, भ्याकुर, चिउरीबाट जीविकोपार्जन गर्छन् उनीहरु ।

चेपाङको जीवन बनजंगल र जमिनसँग जोडिएको छ । त्यसैले उनीहरुको बसोबास बनजंगल नजिक, भिरालो परेको जमिन, खोलानजिक छरिएर रहेको पाइन्छ । घरहरु सामान्यतयाः एकतले ढुंगा र माटोले बनेको र खरले छाएको पाइन्छ । चेपाङ जाति आर्थिक, सामाजिक, शैक्षिक हरेक हिसाबले निकै पछाडि छ ।

Facebook Comments

विज्ञापन बक्स