२ असोज, काठमाडौं । नेविसंघले त्रिभुवन विश्वविद्यालयका उपकुलपति कार्यालय अगाडि टायर बालेर प्रदर्शन गर्दै उपकुलपति धर्मकान्त बाँस्कोटालाई कार्यालय प्रवेश गर्न दिएको छैन ।
शुक्रबार नेविसंघले उपकुलपतिलगायत पदाधिकारी प्रवेशमा अवरोध गरेको हो। उपकुलपति कार्यालय अगाडि सडकमा टायर बालेर नेविसंघ त्रिवि समितिले प्रदर्शन पनि गरेको थियो ।
त्रिविले छ महिना हुँदा पनि परीक्षा र पठनपाठनको उचित व्यवस्थापन गर्न नसकेको, त्रिविमा नेपाल कम्युनिष्ट पार्टी नेकपा निकटका मानिसलाई भर्ती केन्द्र बनाएको र नेविसंघ त्रिवि सचिव योगेन्द्र रावललाई झूटा मुद्दा लगाएको भन्दै नेविसंघले त्रिवि पदाधिकारीलाई प्रवेशमा रोक लगाएको थियो।
नेविसंघले यसअगाडि राखेका माग पनि त्रिविले सुनुवाइ नगरेको र वार्तामा नबोलाएको नेविसंघको आरोप छ।
