निजी मेडिकल कलेजको स्वामित्व लिएर आफै सञ्चालन गर्न सरकारलाई अनेरास्ववियूको आग्रह

९ आश्विन २०७६

९ असोज, काठमाडौँ । सत्तारूढ दल नेकपा निकट विद्यार्थी संगठन अनेरास्ववियूले सरकारलाई निजी मेडिकल कलेजको स्वामित्व लिएर आफैं सञ्चालन गर्न आग्रह गरेको छ ।

निजी मेडिकल कलेज सञ्चालकहरुले कलेज चलाउन नसक्ने भन्दै सरकारलाई साँचो बुझाउने भनेपछि केन्द्रीय संयोजक ऐन महरले बिहीबार विज्ञप्ति निकालेर सरकार आफैंले सञ्चालन गर्न आह्वान गरेका हुन् ।

’राज्यको नीति नियममा बसेर साँच्चीकै कलेज चलाउन नसक्ने हो भने राष्ट्रिय चिकित्सा शिक्षा ऐनको प्रावधान समेतलाई दृष्टिगत गर्दै त्यस्ता कलेजहरुको जिम्मा लिएर आफैं सञ्चालन गर्न वा राज्यको नीति नियम मान्ने अन्य निकायलाई सञ्चालन गर्ने जिम्मा दिन नेपाल सरकारलाई आह्वान गर्दछौं’ विज्ञप्तिमा छ ।

उनले बढी लिएको शुल्क फिर्ता गरी तत्काल भर्ना प्रक्रिया अघि बढाउन निजी मेडिकल कलेज सञ्चालकहरुलाई आग्रह गरे । उनले अनेक घुर्की, धम्की र वितण्डा मच्चाउन छाडेर सरकारको अग्रसरतामा भएको वार्ता र निर्णय पालना गर्न पनि संयोजक महरले ध्यानाकर्षण गराएका छन् ।

मनपरी ढंगले शुल्क लिएको भन्दै सरकारले कडाइ गरेपछि निजी मेडिकल कलेज सञ्चालकहरुले विद्यार्थी भर्ना नगर्ने र कलेजको साँचो सरकारलाई बुझाउने चेतावनी दिएका थिए।

सरकारले चिकित्सा शिक्षाअन्तर्गत एमबीबीएस तहमा उपत्यकाभित्र ३८ लाख ५० हजार र उपत्यका बाहिर ४२ लाख ५० हजारभन्दा बढी शुल्क लिन नपाउने मापदण्ड तय गरेको थियो।

त्यस विपरीत मनपरि शुल्क लिने क्रम नरोकिएपछि भएको आन्दोलन पश्चात् वढि लिएको शुल्क फिर्ता गर्ने सरकारको निर्देशन पालना गर्न निजी मेडिकल कलेजहरुले आनाकानी गरिरहेका छन्।ईकान्तिपुरबाट साभार ।

Facebook Comments

विज्ञापन बक्स