विराटनगर, मंसिर २२
विराटनगर जुनियर जेसीजद्धारा आयोजित २३ औँ अन्तर विद्यालय ‘टेस्टी टेस्टी क्वीज कन्टेष्ट’को उपाधी इटहरीको लिटल फ्लावर्स स्कुलले जितेको छ । शुक्रबार विराटनगरको विरेन्द्र सभागृहमा भएको फाइनल प्रतियोगितामा लिटल फ्लावर्सले ५ वटा प्रतिस्पर्धी विद्यालयलाई पछि पार्दै उपाधी जित्न सफल भएको हो ।
टेस्टी टेस्टी क्वीज कन्टेष्टको उपाधी पहिलो पटक विराटनगर बाहिरको विद्यालयले जितेको हो । उपाधीसँगै फ्लावर्सले नगद १५ हजार, ट्रफी र प्रमाण पत्र पाएको छ ।
प्रतियोगितामा विराटनगरको सगरमाथा स्कुलले दोस्रा स्थान हासिल ग¥यो भने एभरेष्ट स्कुल तेस्रो स्थानमा रह्यो । दोस्रा स्थान हासिल गरेको सगरमाथाले नगद १० हजार, ट्रफी र प्रमाण पत्र प्राप्त गर्यो। त्यस्तै तेस्रो स्थानमा रहेको एभरेष्टले प्रतियोगितामा नगद ५ हजार सहित ट्रफी र प्रमाण पत्र प्राप्त गर्यो।
विराटनगर महानगरपालिकाका मेयर भीम पराजुली, काबरा गु्रपका म्यानेजीङ डाइरेक्टर श्याम काबरा र नवलकिशोर काबरा, विराटनगर जेसीजका पूर्व गोपाल गुप्ता, इन्द्र खेतान, टिपि आचार्य, प्रज्वललाल श्रेष्ठ, देवेश प्रधान, जुनियर जेसीजका राष्ट्रिय संयोजक अभिनाष थापा, विराटनगर जुनियर जेसीजका अध्यक्ष मिलाप कर्णले विजेता विद्यालयलाई पुरस्कार वितरण गरेका थिए ।
पाँच दिन सम्म चलेको सो प्रतियोगितामा मोरङ र सुनसरी जिल्लाका गरी जम्मा ३६ वटा विद्यालयले सहभागिता जनाएको विराटनगर जुनियर जेसीजका अध्यक्ष मिलाप कर्णले जानकारी दिए । बिहिबार सम्पन्न सेमीफाइनल प्रतियोगिताबाट ६ विद्यालय फाइनल चरणमा प्रवेश गरेका थिए ।
विराटनगरको उत्कृष्ट एवम् चर्चित सो प्रतियोगितालाई काबरा गु्रपले सुरुवातदेखि नै एक्लो प्रायोजकको रुपमा प्रायोजन गर्दै आईरहेको छ ।
