फिफा विश्वकप र एसियन कपको छनोट खेल सन् २०२१ सम्मका लागि स्थगित

0SHARES

२८ श्रावण २०७७ नेपाल टाईम्स

२८ साउन, काठमाडौं । सन् २०२२ मा कतारमा हुने फिफा विश्वकप र सन् २०२३ मा चीनमा हुने एसियन कपको संयुक्त छनोट अन्तर्गत नेपालको बाँकी तीन खेल फेरी स्थगित भएका छन् ।

यसअघि कोरोना संक्रमणका कारण पूर्वनिर्धारित मतिमा खेल हुन नसकेपछि एएफसीले २ महिनाअघि अक्टोबर र नोभेम्बरमा खेल गर्न नयाँ मिति सार्वजनिक गरेको थियो । दशरथ रंगशालामा हुने भनिएको खेल अब कम्तिमा सन् २०२१ सम्मको लागि स्थगित भएको छ ।

एएफसीले छनोटमा सहभागी सबै सदस्य राष्ट्रलाई जुलाई ३१ सम्म अक्टोबरमा हुने खेलको विस्तृत विवरण माग गरेकोमा धेरै राष्ट्रले कोरोना भाइरस संक्रमणका कारण खेल आयोजना गर्न नसक्ने बताएपछि खेल स्थगित भएको हो । सहभागी राष्ट्रहरुले कोरोनाका कारण सरकारले अन्तर्राष्ट्रिय आवागमनमा लगाएको प्रतिबन्धका कारण तयारी हुन नसकेको जनाएका छन् ।

यस्तै खेल गर्न आवागमन सहज भएपनि स्वास्थ्यको दृष्टिकोणले हाल खेल गर्न सहज नहुने निर्क्यौल एएफसीको रहेको छ । एन्फाले भने खेलाडीलाई पीसीआर परिक्षण गराएर बन्द प्रशिक्षण गराउने तयारी गरेको थियो । दशरथ रगंशालाको काम पनि नियमित हुँदै आएको थियो ।

छनोट अन्तर्गत समूह सी मा रहेको नेपालले आफ्नो अन्तिम तीन खेल खेल्न बाँकी रहेको छ । नेपालले बाँकी तीनै खेल आफ्नो घरेलु मैदान दशरथ रंगशालामा खेल्ने कार्यक्रम रहेको छ । सुरुवात पांच खेलमा नेपालले १ जित र ४ हारसहित ३ अंक जोडेको छ । पाँच राष्ट्र सम्मिलित समूहमा नेपाल चौथो स्थानमा छ ।

विज्ञापन बक्स