भ्रष्टाचार लगायतका अभियुक्तको नागरिकता विवरण र फोटो अनिवार्य पेश गर्न विशेष अदालतको पत्राचार

0SHARES

३० भाद्र २०७७ नेपाल टाईम्स

३० भदौ, काठमाडौं । भ्रष्टाचार, सम्पत्ति शुद्धीकरण र राष्ट्र विप्लवजस्ता मुद्दाका अभियुक्तको फोटो पठाउन विशेष अदालतले सम्बन्धित निकायलाई पत्राचार गरेको छ।

आइतबार विशेष अदालतले ती मुद्दाका अभियुक्तहरूको फोटो पठाउन अख्तियार दुरूपयोग अनुसन्धान आयोग, सम्पत्ति शुद्धीकरण विभागमा पत्राचार गरिएको विशेष अदालतका रजिष्ट्रार अशोक क्षेत्रीले जानकारी दिए।

मुलुकी फौजदारी कार्यविधि संहिता २०७४ को दफा ३२ (१)(घ)ले अदालतमा अभियोगपत्र पेश गर्दा प्रतिवादी वा अभियुक्तको फोटो पनि साथै राखी पेश गर्नुपर्ने भनिएको छ । फोटो भए, पछि फैसला कार्यान्वयन गर्ने बेला वा पक्राउ गर्ने प्रयोजनका लागि पनि निकै सहज हुने र कानुनमै भएकाले त्यसको कार्यान्वयन गर्न भनिएको उनले बताए ।

अहिलेसम्म अख्तियार वा विभाग कसैले पनि अभियुक्तको फोटो अभियोगपत्रका साथ पेश गर्दैनथें । अब भने अनिवार्य पेश गर्न विशेष अदालतले पत्राचार गरेको हो।

त्यतिमात्र होइन अभियोगपत्रमा अभियुक्तको नागरिकता नम्बर, नागरिकता जारी गरेको जिल्ला र नागरिकता जारी गरेको मिति समेत उल्लेख गर्न पनि विशेषले पठाएको पत्रमा उल्लेख छ।

नागरिकताको विवरण भए मुद्दा तामेली, म्याद जारी वा फैसला कार्यान्वयनको प्रक्रिया सहज हुने रजिष्ट्रार क्षेत्रीले बताए।

विज्ञापन बक्स