टेकराज बन्जरा
२२ साउन, सुनसरी ।
कोशी ब्यारेजको सुनसरी क्षेत्रको कोशी गाउँपालिकामा मात्रै लहरै ५४ वटा माछाका परिकार बेच्ने पसलहरु छन् ।
त्यस ठाउँमा नेपालीबाहेक भारतीयहरुले पनि माछा बेच्दै आईरहेका छन् । पसल सञ्चालकहरुका अनुसार माछा खानको लागि दैनिक ७ देखि १५ हजारसम्म मानिसहरु त्यहाँ जाने गरेका छन् । माछा खाने मात्र नभई स्वादिलो हुने विश्वासले त्यस क्षेत्रबाट यात्रुहरुले कोशेलीको रुपमा किनेर समेत लाने गरेका छन् ।
कोशीको छेऊमा बसेर स्वादिष्ट माछा खानुको मज्जा नै बेग्लै हुने गरेको त्यहाँ जाने माछाका पारखीहरु बताउँछन् । कोशी ब्यारेजमा भेटिएका सुनसरीको दुहवी घर भएका राजिवकुमार चौधरी पनि स्वादिष्ट भएकै कारण त्यस क्षेत्रमा जाँदा प्रत्येक पटक माछा खाएर फर्किने गरेको बताउँछन् ।
कोशी ब्यारेजको पुल वारी– पारी दईतिरै माछा पसलहरु छन् । त्यहाँका व्यापारीहरुले माछा बेचेरै दैनिक औसत २हजारसम्म बचत गर्ने गदर्छन् । एक सय रुपैयामा तपाईले एक प्लेट माछा खाजाका साथ कोशी ब्यारेजमा पाउन सक्नुहुन्छ । माछापारखीहरुले विशेषत सप्तकोशी नदीमा पाईने झिगा (प्राउन), काटी, जलकपुर, मरौड लगायतका प्रसिद्ध जातका माछाहरु खान रुचाउने व्यापारीहरु बताउँछन् । त्यस ठाउँमा सुर्याेदयसँगै माछा फ्राई, ग्रेभी तथा माछा र भात पाक्ने गर्दछ ।
कोशीको अवलोकन गर्दै माछा खानको लागि पूर्वका सुनसरीको इनरुवा, धरान, विराटनगर र झापासम्मका माछा पारखी र भारतबाट पनि मानिसहरु बढी मात्रामा आउने गरेको विगत २५ वर्षदेखि पसल सञ्चालन गर्दै आएकी सञ्जिला खातुन बताउँछिन् ।
त्यस्तै अर्का सञ्चालक अमर शर्मा पनि विभिन्न ठाउँहरुबाट मानिसहरु माछा खान आउने बताउँछन् । आएर माछा खाने ग्राहकहरुले दिने राम्रो प्रतिक्रियाले आफू लामो समयदेखि यस पेशामा बसिरहेको उनी बताउछन् ।
माछाका लागि चर्चित मानिएको कोशी किनारमा पछिल्लो समय पहिलेको तुलनामा अहिले माछाहरु भने पाउन छोडेका छन् । कोशीको विशेष मानिएको जलकपुर र काटी माछा त दुर्लभ नै बन्दै गईरहेको मछवारेहरुको भनाइ छ । कोशीमा माछा दुर्लभ हुँदै गएपछि पछिल्लो समय माछाको मुल्य भने केही बढ्दै गएको छ ।
