१७ साउन, चितवन ।
चितवन राष्ट्रिय निकुञ्जको सुरक्षार्थ खटिएका सैनिकको कुटपिट पछि मृत्यु भएका राप्ती नगरपालिका–२ पिप्ले मिलनटोलका राजकुमार चेपाङका परिवारलाई १० लाख रुपैयाँ राहत उपलब्ध गराउने सहमती भएको छ ।
शुक्रबार साँझ जिल्ला प्रशासन कार्यालयमा भएको छलफलमा मृतकका परिवारलाई निकुञ्जले ७ लाख र राप्ती नगरपालिकाले ३ लाख रुपैयाँ दिने सहमति जनाएका हुन् ।
राप्ती नगर प्रमुख प्रभा बराल, उपप्रमुख इमानसिंह लामा, नेकपा जिल्ला अध्यक्ष यमबहादुर परियार, कांग्रेस जिल्ला सभापति जितनारायण श्रेष्ठ, राप्ती–२ का वडाध्यक्ष श्यामसुन्दर उप्रेती, राप्ती–१२ का वडाध्यक्ष अर्जुन चेपाङको रोहबरमा सहमति भएको हो । प्रमुख जिल्ला अधिकारी नारायणप्रसाद भट्टराई निकुञ्जका प्रमुख संरक्षण अधिकृत नारायण रुपाखेती र निकुञ्ज सुरक्षार्थ तैनाथ बटुक दल गणका गणपति प्रमुख सेनानी अरुण श्रेष्ठसमेत सहभागी बैठकले उक्त निर्णय गरेको हो ।
मृतकका परिवारलाई राहत उपलब्ध गराउने मिति भने सहमतिपत्रमा उल्लेख छैन ।सहमतिपछि राजकुमारका बुवा विष्णुलाल उनको शव बुझ्न शनिबार काठमाडौं गएका छन् । विष्णुलालले भने– ‘त्यसैले शव बुझ्न जाने कि नजाने भन्ने थियो । तर जनप्रतिनिधिहरुका साथै प्रशासककै रोहबरमा भएको सहमति पालना हुन्छ भन्ने विश्वासले बुझ्ने भइयो ।’
राजकुमारसहित मिलनटोलका ५ युवक र २ महिला गत साउन १ मा निकुञ्जको सिमाना राप्ती नदी तरेर निकुञ्जभित्र रहेको ज्युँडी खोला गएका थिए । खोलामा घोँगी र जंगलमा अमिलो टिप्ने योजना उनीहरुको थियो । उनीहरुलाई निकुञ्ज सुरक्षाका लागि खटिएका एक सैनिकले ज्युँडी खोलाबाट पक्राउ गरेका थिए । त्यसपछि कुटपिट गर्दै निकुञ्जको लिगलिगे पोस्ट र्पुयाएका थिए ।
दुई महिलाबाहेक सबैले पिटाइ खाए पनि राजकुमार धेरै बिरामी परेका थिए । स्थानीय मेडिकलमा गरिएको उपचारले निको नभएपछि साउन ७ गते बुधबार राति उनलाई परिवारले पिप्लेबाट भरतपुर लगेका थिए । भरतपुर अस्पतालको आकस्मिक कक्षमा र्पुयाउने बित्तिकै चिकित्सकले राजकुमारलाई मृत घोषणा गरेका थिए । उनको बाटोमै मृत्यु भएको थियो । तत्काल किरिया खर्च एक लाख रुपैयाँ दिने भनेपछि परिवारका सदस्यहरुले पोस्टमार्टम गर्न स्वीकृति दिएका थिए । तर, भरतपुर अस्पतालले पोस्टमार्टमका लागि शव काठमाडौं पठाएको थियो ।
गत सोमबार त्रिवि शिक्षण अस्पतालमा पोस्टमार्टम भए पनि परिवार शव नबुझी चितवन फर्केका थिए । शुक्रबार भएको छलफलमा घटनाको अनुसन्धान गरेर दोषीलाई कारबाही गर्ने समेत सहमति भएको छ । मृतक राजकुमारकी डेढ वर्षीया छोरीलाई उमेर नपुग्दासम्म भरणपोषण र १२ कक्षासम्मको शिक्षाका लागि लोथर मध्यवर्ती उपभोक्ता समितिमार्फत चितवन निकुञ्जले सहयोग गर्ने पनि जनाइएको छ । राजकुमारको परिवार बस्ने घर मर्मतमा पनि निकुञ्जले सहयोग गर्ने प्रतिबद्धता गरेको छ ।
