२७ कात्तिक, विराटनगर ।
होटल सञ्चालकसँगको मिलेमतोमा मानव बेचविखनमा संलग्न विराटनगरको एक होटलमा कार्यरत भारतीयलाई प्रहरीले पक्राउ गरेको छ । विराटनगर–१५ रानीमा रहेको हिमालय गेष्टहाउसमा कार्यरतभारतको विहार घर भएका ४५ वर्षीय मो. रियाजलाई मंगलबार प्रहरीले पक्राउ गरेको हो ।
रियाजले उक्त होटलका संचालकसँगको मिलेमतोमा मानव वेचविखन विरूद्धको कसुर अन्तर्गतको कार्यहरू गर्दै आएकोले उनलाई पक्राउ गरिएको जिल्ला प्रहरी कार्यालय मोरङले जनाएको छ ।
उनीहरूले भारत फार्विसगन्ज घर भएकी विराटनगर वस्ने एक महिलालाई केहीदिन पहिले उक्त गेष्ट हाउसमा काम लगाईदिने भन्दै करकापमा तथा प्रभावमा पारी वेश्यावृतिमा लगाउने गरेको प्रारम्भिक अनुसन्धानबाट खुल्नआएको जिल्लाप्रहरी कार्यालय मोरङका डिएसपी राजकुमार खिउजुले जानकारी दिए ।
पक्राउ परेका रियाजउपर मानव वेचविखन तथा ओसारपसार (नियन्त्रण)ऐन, २०६४ बमोजिम अनुसन्धान भईरहेको डिएसपी खिउजुले बताए ।
