विराटनगर,असोज १४
विराटनगरलाई प्रदेश एकको स्थायी राजधानी कायम गर्न दबाबदिन दवावमूलक अन्र्तक्रिया गरिएको छ ।
उद्योग संगठन मोरङको अगुवाईमा आइतबार आयोजित अन्तरक्रियात्मक सुझाव संकलन कार्यक्रमका सहभागि सरोकारवालाले सबै हिसाबले प्रदेश एकको स्थायी राजधानीकालागि विराटनगरनै उपयुक्त भएको निश्कर्ष निकालेका छन् ।
कार्यक्रमका सहभागिले ऐतिहासिक,राजनैतिक र भौतिक संरचना लगायत सबै आधारमा स्थायी राजधानीकालागि विराटनगरको विकल्प नभएको बताएका थिए ।
उद्योग संगठन मोरङका अध्यक्ष भीम घिमिरेले तुलनात्मकरुपमा अन्य शहरभन्दा विराटनगर सबै आधारमा स्थायी राजधानीकालागि उपयुक्त रहँदा रहदै अन्यत्र सार्ने चलखेल हुनु दुर्भाग्यपुर्ण रहेको बताए । उनले भने हरेक कुरामा विराटनगर राजधानीका लागि उपयुक्त छ, राजधानी अन्यत्र लाने प्रयास अन्यापूर्ण हुनेछ । विराटनगरलाई नै स्थायी राजधानी कायमगर्न दबाबमुलक कार्यक्रम र आवश्यक परे शान्तिपुर्ण आन्दोलन घोषणा गरिने पनि उनले चेतावनी समेत दिए ।
प्रदेश सभाका सांसद केदार कार्कीले विराटनगरलाई नै स्थायी राजधानी कायमगर्न आफुहरु लागिपरेको बताए । उनले अन्यत्र राजधानी लग्दा अरबौंको भौतिक संरचना निर्माण गर्नुपर्ने भएका कारण विराटनगरमा भएका भौतिक संरचनाको सदुपयोगगर्दै राजधानी कायम गर्नुपर्ने विचार ब्यक्त गरे ।
विराटनगर महानगरपालिकाकी उपप्रमुख इन्दीरा कार्कीले विगतका अनुभवबाट पाठ सिकेर समेत विराटनगरलाई नै राजधानी कायम गर्नुपर्ने बताइन् । एलिट क्लबका अध्यक्ष भेषराज धमलाले अरबौं लगानी गरेर राजधानी अन्यत्र लानु तर्कसंगत नहुने बताए ।
प्याब्सनका केन्द्रीय सल्लाहकार टिकाराम पुरीले सम्पूर्ण मन्त्रालय र महत्वपूर्ण कार्यालयहरु एकैठाँउमा राख्नुपर्ने विचार ब्यक्त गरे ।
अन्तरक्रियामा चिकित्सक,सामाजिक अभियन्ता,संयुक्त टोल नगर समन्वय समिति,साहित्यकार लगायतले विराटनगरलाई स्थायी राजधानी कायम गराउन संघर्ष समिति गठन गरेर दबाबमुलक कार्यक्रम संचालन गर्नुपर्ने सुझाव दिएका छन् ।
