२ मंसिर, काठमाडौं । विवेकशील नेपाली दलका दुई तिहाई सदस्यहरु साझा पार्टीसँग एकीकरण गर्न सहमत भएका छन् । दलले २६ र २७ कात्तिकमा एसएमएस र ईमेलबाट गरेको मतदानका क्रममा दुई तिहाइ सदस्यले एकीकरण गर्न सहमति दिएका हुन् ।
तर, पार्टी एकीकरण भने राजनीतिक संवाद समितिले तयार पारेको संयुक्त प्रतिवेदन अनुसार हुनुपर्नेछ । पार्टी अध्यक्ष मिलन पाण्डेका अनुसार विवेकशील नेपाली दलको विधानअनुरूप सहभागितामूलक लोकतन्त्रको व्यवहारिक अभ्यास गर्दै साझा पार्टीसँग एकीकरणसम्बन्धी प्रस्तावमा मतसंग्रहका लागि मतदान गरिएको थियो ।
शीर्ष नेताहरू मात्र मिलेर पार्टी एकीकरण गर्ने प्रचलनलाई तोड्दै विवेकशील नेपाली दलले आम सदस्यहरूको मतमार्फत एकीकरणको निर्णय गरेको जनाएको छ ।
साझा पार्टीले भने एकतासम्बन्धी प्रस्ताव केन्द्रीय समितिमा पेश गरेर निर्णय गर्ने जनाएको छ ।
