२० कात्तिक, काठमाडौँ ।
सरकार चलाई रहेको देशकै शक्तिशाली दल नेकपा फुटको संघारमै पुगेको चर्चा चुलिएका बेला प्रधानमन्त्री निवास बालुवाटारमा नेकपा अध्यक्षद्वय केपी शर्मा ओली र पुष्पकमल दाहालबीच आज भएको झण्डै तीन घण्टा लामो छलफलमा पनि सहमति हुन नसकेको कुरा बाहिर आएको छ ।
उनीहरुबीच सहमति हुनु भन्दा विवाद झन चर्काएका कुराहरु आइरहेका छैन । छलफलमा नेताहरुले पुरानै अडान दोहोर्याएपछि सहमति बन्न नसकेको बुझिएको छ । संवादहीनताका बीच दुई अध्यक्षका बीच बालुवाटारमा संवाद हुनुलाई भने सुधार र महत्वका साथ हेरिएपनि आजको भेटपछि प्रचण्डले अब वार्ताका लागि बालुवाटार नआउने अभिब्यक्ति दिएको नेकपा स्रोतले बताएको छ । भेटमा प्रचण्डले स्थायी कमिटिको बैठक राखौं भन्ने प्रस्ताव ओलीले अस्वीकार गरेको बुझिएको छ ।
प्रधानमन्त्रीसमेत रहेका ओलीले प्रचण्डलाई भेट्नुअघि पार्टीमा ठूलै संकट आउन लागेको र त्यसको सामानाका लागि तयार हुन मन्त्रीहरुलाई निर्देशन दिएका छन् । उनले आफूअनुकुल मन्त्रिमण्डल परिवर्तन गर्ने तयारी गरेको पनि बुझिएको छ ।यस्तै दल विभाजनसम्बन्धी अध्यादेशको तयारी समेत भईरहेको बताइएको छ । सत्तारुढ दल नेकपामा सरकारले गरेको राजदूतको नियुक्तिको सिफारिसदेखि मन्त्रिपरिषद् पुनर्गठन, कर्णाली विवाद र रअका प्रमुखको नेपाल आगमनसमेतलाई लिएर विवाद हुँदै आएको छ ।
बालुवाटारमा अध्यक्षद्वयबीच सोही विषयमा छलफल भएको भएपनि कुनै सहमति हुन नसकेको हो । बिहीबारको भेटमा पनि प्रचण्डले स्थायी समितिका निर्णयहरु कार्यन्वयन नगरेको पर्सामा नेता चौरसिया मृत्यु प्रकरणमा छानविनका लागि सरकारले तदारुकता नदेखाएको तथा कर्णाली विवादमा समस्या समाधान गर्नुको साटो चर्काउन खोजेको भन्दै असन्तुष्टि जनाएका थिए । यसेबीच प्रचण्डलगायत शीर्ष नेताले बिहीबार केही कानुन व्यावसायीसँग समेत छलफल गरेका छन् । पार्टी कार्यालय पेरिसडाँडामा आज बिहान प्रचण्ड, वरिष्ठ नेता माधवकुमार नेपाल र प्रवक्ता नारायणकाजी श्रेष्ठलगायतले कानुन व्यावसायीसँग छलफल गरेका हुन् । पार्टीभित्रै विवाद चुलिएका बेला प्रधानमन्त्रीले लिनसक्ने एक्सन, महामारीको बहानामा उठाउन सक्ने कदमको कानुनी अवस्थाबारे नेताहरुले कानुन व्यावसायीसँग छलफल गरेको बुझिएको छ ।
पार्टी अध्यक्ष एवं प्रधानमन्त्री ओलीले पार्टीको निर्णय नमानेको, पार्टी र सरकारमा एकालौटी ढंगले अघि बढेको विषयमा प्रचण्ड, नेपाल, झलनाथ खनालसमूह असन्तुष्ट छन् । पार्टीभित्र विवाद बढ्दै गएका बेला बुधबार प्रधानमन्त्री ओलीले आफुले जुनसुकै परिस्थितिमा प्रधानमन्त्रीबाट राजीनामा नदिने र आफुले राजिनामा दिए देश बर्बादीतिर जाने बताएका थिए । उनको यो अभिब्यक्तिपछि उनलाई पुन रमजीनामा दिन दबाब दिइएको र नै उनले प्रचण्डलाई अलग अलग जान सकिने अभिब्यक्ति दिएको हुन सक्ने आकलन गरिएको छ ।
