११ भदौ, काठमाडौं ।
समाजको उत्थानको लागि युवा उद्यमशिलता आवश्यक रहेको श्रम, रोजगार तथा सामाजिक सुरक्षा मन्त्री गोकर्ण विष्टले बताएका छन् ।
युवा नेतृत्व, सिर्जना र उद्यमशिलता राष्ट्रिय सम्मेलनको आज काठमाडौंमा उद्घाटन गर्दै मन्त्री विष्टले सामाजिक उत्तरदायित्वसहितको उद्यमशिलता आजको आवश्यकता रहेको जिकिर गरे ।
युवाहरुको सही परिचालनबाट मात्र मुलुकको विकास हुने भन्दै उनले सरकारले युवा लक्षित कार्यक्रम ल्याउने आश्वासन दिए । आर्थिक, सामाजिक दृष्टिकोणले अगाडि बढ्नका लागि सामाजिक उद्यमशिलता अपरिहार्य रहेको उनको भनाइ थियो ।
कार्यक्रममा बोल्दै राष्ट्रिय युवा परिषद्का अध्यक्ष माधव ढुंगेलले युवाहरुलाई सामाजिक उद्यमशिलतासँग जोड्नु पर्ने बताए । युवाहरुलाई राष्ट्रको मुलधारमा ल्याउनका लागि युवामैत्री कार्यक्रम ल्याउनु पर्ने उनको भनाइ थियो ।
युवा सम्मेलनमा सातवटै प्रदेशका १५४ युवा उद्यमी समूहको सहभागिता छ ।
