१४ फागुन, एजेन्सी ।
दक्षिण कोरियामा रहेका एक अमेरिकी सैनिकमा कोरोना भाइरस (कोभिड–१९) को संक्रमण देखिएको छ ।
दक्षिण कोरियामा रहेको युनाइटेड स्टेड फोर्सेज कोरिया (यूएसएफके) मा कार्यरत अमेरिकी सैनिकमा कोरोना भाइरसको संक्रमण देखिएको यूएसएफकेको जनसम्पर्क विभागले जानकारी दिएको छ ।
दक्षिण कोरियाको क्याम्प क्यारोलमा रहेका २३ वर्षीय सैनिकलाई कोरोना संक्रमण देखिएको हो। यूएसएफके र कोरिया रोग नियन्त्रण तथा रोकथाम केन्द्र(केसीडीसी) का स्वास्थ्यकर्मीहरुले उनको स्वास्थ्य क्याम्पमा रहेका अन्य सैनिकमा संक्रमण भएको नभएको जाँच गरिरहेका छन्।
कोरियाली प्रायद्वीपमा रहेका अमेरिकी सेनामा संक्रमण नहोस् भनेर पूर्ण रुपमा सावधानी अपनाइएको यूएसएफकेले जनाएको छ। अमेरिकी सेनाको बेस क्याम्प ‘क्याम्प क्यारोल’ दक्षिण कोरियाली सहर डेइगुबाट २२ किलोमिटर मात्रै टाढा रहेको छ।
जहाँ कोरोना भाइरसको प्रकोप फैलिइरहेको छ। ती सैनिक डेइगुबाट ४ किलोमिटर टाढा रहेको क्याम्प वाकर पनि पुगेको यूएसएफकेले जानकारी दिएको छ।
पछिल्लो समय चीनमा तुलनात्मक रुपमा कोरोना भाइरसको संक्रमण कम भए पनि दक्षिण कोरिया, इटाली र इरानमा भने बढी देखिएको छ। दक्षिण कोरियामा मंगलबार थप १६९ जनामा कोरोना भाइरसको संक्रमण देखिएको छ।
बुधबार बिहानसम्म दक्षिण कोरियामा एक हजार एक सय ४६ जनामा संक्रमण पुष्टि भएको छ। बुधबार बिहानसम्म दक्षिण कोरियामा १२ जनाको मृत्यु भएको छ।
त्यस्तै इरानमा बुधबार बिहानसम्म १६ जनाको मृत्यु भएको छ। त्यस्तै ९५ जनाको कोरोना संक्रमण देखिएको छ। इटालीमा ११ जनाको मृत्यु भएको र ३२३ जनामा संक्रमण देखिएको विश्व स्वास्थ्य संगठनले जनाएको छ।
