१३ वैशाख, वीरगञ्ज ।
कोरोना महामारीको दोस्रो लहर आएसँगै वीरगञ्ज क्षेत्र उच्च जोखिममा देखिएको छ ।
महामारीको सुनामी खेपिरहेको भारतसंगको मुख्य नाका रहेको वीरगञ्ज क्षेत्र कोरोनाको पहिलो लहरमासमेत हटस्पट बनेको थियो ।
पछिल्लो पटक नारायणी अस्पतालमा गरिएको परीक्षणमध्ये ७० प्रतिशतभन्दा बढीमा कोरोना संक्रमण देखिएपछि स्थिति भयावह हुने देखिएको छ ।
अस्पतालका कोभिड संयोजक डा. सरोज रोशन दासका अनुसार अस्पतालको प्रयोगशालामा पछिल्लो २४ घण्टामा गरिएको १४० जनाको परीक्षणमा ९९ जनामा कोरोना पुष्टि भएको छ।
संक्रमितमध्ये पर्सा ८६ जना रहेको डा. दासले जानकारी दिए। यस्तै‚ बाराका १०, रौतहटका दुई र सर्लाहीका एकजना संक्रमित छन्। संक्रमितमध्ये ६५ जना पुरुष र ३४ जना महिला हुन्।
उनीहरू १० देखि ७२ वर्षसम्मका रहेको डा. दासले बताए।
