रत्ननगर, चितवन, २७ वैशाख ः चितवनको विकट क्षेत्र इच्छाकामना गाउँपालिका वडा नं २ हेच्चेकको जोखिम क्षेत्रका आठ घर भूकम्पपीडितले सुरक्षित स्थानमा जग्गा प्राप्त गरेका छन् ।
राष्ट्रिय पुनःनिर्माण प्राधिकरण जिल्ला आयोजना कार्यान्वयन इकाइ (अनुदान व्यवस्थापन तथा स्थानीय पूर्वाधार) कार्यालयले सोही वडाको दुम्किम भन्ने स्थानमा आठ घर प्रभावितलाई जग्गा उपलब्ध गराएको हो ।
“दुम्किममा बुधबार स्थलगत निरीक्षणपछि चार कट्ठा जग्गा खरिदको सहमति भयो, केही दिनभित्रैमा पीडितको नाममा जग्गा पास हुन्छ, प्राधिकरणको जिल्ला आयोजना कार्यान्वयन इकाइ प्रमुख पुष्कर पोखरेलले भने, “समथर भूभागको सुरक्षित स्थानमा उनीहरूले जग्गा प्राप्त गरेका छन् ।”
प्रति घर १० धुरका दरले जग्गा प्राप्त गरेका उनीहरुले झण्डै एक बिगाहा आवादी जग्गासमेत प्रयोग गर्न पाउने छन् ।
जग्गाधनी उत्तरकुमार गुरुङले पीडितलाई बसेरमात्रै नहुने भएकाले उनीहरुलाई दुःखजिलोका लागि भनेर थप एक बिगाहाजति आवादी हुँदै आएको ऐलानी जग्गासमेत उपलब्ध गराइएको बताए।
यसरी जग्गा प्राप्त गर्नेमा होमबहादुर चेपाङ, रामबहादुर चेपाङ, तुलबहादुर चेपाङ, बलवान चेपाङ, थाकु चेपाङ, बुद्धबहादुर चेपाङ, भगवान चेपाङ र उजेली चेपाङ रहेका छन् । अन्य दुई घरका लागि पनि जग्गा खोजी अन्तिम चरणमा पुगेको जनाइएको छ ।
यसअघि राप्ती नगरपालिकाको एसिखाई र तापाङका १३ घर परिवारलाई स्थानान्तरणका लागि जग्गा उपलब्ध गराइसकिएको राष्ट्रिय पुनःनिर्माण प्राधिकरण जिल्ला आयोजना कार्यान्वयन इकाइ (अनुदान व्यवस्थापन तथा स्थानीय पूर्वाधार) कार्यालयका शाखा प्रमुख राजेन्द्र कार्कीले जानकारी दिए ।
उनका अनुसार इच्छाकामना वडा नं ४ तीनघरेका पाँच घर पीडितलाई लेवाटारमा जग्गा उपलब्ध गराइएको थियो । जिल्लाका अन्य क्षेत्रमा स्थानान्तरणका लागि आवश्यक प्रक्रिया चलिरहेको छ । इच्छाकामनाका अन्य धेरै पीडित राहत लिने प्रक्रियामै रहेको गाउँपालिकाको भूकम्प पुनःनिर्माणका स्रोत व्यक्ति राजन घिमिरेले बताए ।
रासस
