२९ असोज, काठमाडौं ।
निर्मला हत्या प्रकरणमा निलम्बित तीन प्रहरी अधिकारीकाे निलम्बन फुकुवा भएकाे छ ।
केन्द्रीय अनुसन्धान ब्युरो (सीआईबी) बाट अनुसन्धानका लागि कञ्चनपुर पुगेका प्रहरी नायब उपरीक्षक (डीएसपी) अंगुर जिसी, कञ्चनपुरमै कार्यरत प्रहरी नायब निरीक्षक (सई) रामसिंह धामी र प्रहरी जवान चाँदनी साउदको निलम्बन फुकुवा भएको हो । डीएसपी जिसीको निलम्बन गृहले फुकुवा गरेको हो भने धामी र साउदको प्रहरी प्रधान कार्यालयले गरेको हो ।
योसँगै उनीहरु प्रहरीको नियमित काममा फर्किने बाटो खुलेको छ । उनीहरुमाथि लागेको प्रमाण नष्टको मुद्दामा जिल्ला अदालत, कञ्चनपुरले सफाइ दिइसकेको छ ।
सीआईबीका तत्कालीन डीएसपी जिसी, जिल्ला प्रहरी कार्यालय, कञ्चनपुरका डीएसपी ज्ञानबहादुर सेटी, प्रहरी निरीक्षक एकेन्द्र खड्का, प्रहरी नायब निरीक्षक (सई) रामसिंह धामीलाई गृह मन्त्रालयले ३१ भदौ २०७५ मा निलम्बन गरेको थियो ।
तत्कालीन ‘सिन अफ क्राइम सोको’ अफिसर प्रहरी नायब निरीक्षक (सई) हरसिंह धामी र प्रहरी जवान चाँदनी साउद पनि निलम्बनमा परेका थिए । उनीहरुमध्ये डीएसपी सेटी, प्रहरी निरीक्षक खड्का र सई धामीले ३० वर्षे सेवा अवधिका कारण अवकाश पाइसकेका छन् । अवकाश पाइसकेकाहरुले निलम्बित भएका वेलाको सेवा, सुविधाका लागि अपिल गर्न सक्नेछ जनाइएकाे छ ।
बर्खास्त गरिएका तत्कालीन एसपी डिल्लीराज विष्ट र प्रहरी निरीक्षक जगदिश भट्टको हकमा भने मन्त्रिपरिषदबाटै निर्णय हुनुपर्ने स्राेतले जनाएकाे छ ।
