४ कार्तिक, विराटनगर ।
प्रहरीले चाडपर्व लक्षित गर्दै सुरु गरेको तस्कर तथा भन्सार छली नियन्त्रण गर्ने अभियान प्रभावकारी बन्दै गएको छ ।
जिल्ला प्रहरी कार्यालय मोरङले मातहतका कार्यालय समेत बाट गरी अबैध रुपमा भन्सार छली गरी लुकाई छिपाई ल्याएको करिव ११ लाख मूल्य बराबरको सामानहरु बरामद गरेको छ ।
सोमबार विभिन्न समयमा प्रहरी टोलीले ११ लाख मूल्य बराबरको अतिसबाजी (पटका), खाद्यान्न तथा लत्ता कपडाहरु बरामद गरी भन्सार कार्यालयमा बुझाएको हो ।
भारतीय सीमा क्षेत्रमा खटिएको प्रहरी टोली तथा विशेष सुराकीका आधारमा मोरङको कटहरी ४ लोहन्द्रा घाटमा खटिएको प्रहरी टोलीले १ लाख ८० हजार बराबरको पटका, ७ लाख बराबरको लत्ता कपडा तथा २ लाख २० हजार रुपैया बराबरको खाद्यान्न सामानहरु बरामद गरी विराटनगर भन्सार कार्यालयमा बुझाईएको जिल्ला प्रहरी कार्यालय मोरङले जनाएको छ ।
यसैगरी सोमबार विभिन्न समयमा जिल्ला प्रहरी कार्यालय झापा तथा मातहत समेतबाट सीमा क्षेत्रहरुमा गस्तीमा खटिएको प्रहरी टोलीले ३ लाख बराबरको पटक तथा खाद्य सामानहरु बरामद गरी भन्सार कार्यालयमा बुझाएको छ ।
उता जिल्ला प्रहरी कार्यालय सुनसरीबाट खटिएको प्रहरी टोलीले ६० हजार रुपैया बराबरको भन्सार छली गरी ल्याएका खाधान्न सामानहरु बरामद गरी भन्सार कार्यालयमा बुझाएको छ ।
